Mbrëmë, të enjten më 6 tetor, presidenti amerikan foli në një event për mbledhjen e fondeve të organizuar në Nju Jork nga James Murdoch, djali i konservatorit Rupert Murdoch. Deri më tani, Shtëpia e Bardhë dhe Pentagoni kanë qenë të kujdesshëm në çdo deklaratë dhe teza e mbështetur ishte se nuk mund të përjashtohet që Putini mund të përdorë armët taktike bërthamore, por deri më tani nuk ka pasur shenja konkrete alarmi.
Gjithsesi SHBA- të dhe BE-ja kanë thënë shpesh më parë se kërcënimet bërthamore të Putinit duhet të merren seriozisht.
Por Këshilltari i Sigurisë Kombëtare i SHBA-ve, Jake Sullivan, javën e kaluar tha se pavarësisht nga sugjerimet bërthamore të Moskës, SHBA-të nuk kishin parë asnjë shenjë se Rusia po përgatitej së shpejti të përdorte një armë bërthamore.
Biden, nga ana tjetër, ditën e djeshme u shpreh qartë: “Për herë të parë që nga kriza e raketave Kubane (1962) ne duhet të përballemi me kërcënimin e një bombe, veçanërisht nëse gjërat vazhdojnë në drejtimin që po shkojmë”.
Në vitin 1962, SHBA-të dhe Bashkimi Sovjetik, nën Presidentin Kennedy dhe Nikita Hrushov, iu afruan një përballje bërthamore mbi vendosjen e armëve bërthamore ruse në Kubë.
Konfrontimi konsiderohet nga shumë ekspertë si më i afërti ndonjëherë pranë një lufte bërthamore në shkallë të plotë.
Biden vazhdoi në fjalën e tij: «A po përpiqemi të kuptojmë se çfarë ka rezervuar Putini? Nëse ai do të gjejë një rrugëdalje? Si do të reagojë kur të kuptojë se ka humbur jo vetëm fytyrën, por edhe pushtetin? Kemi të bëjmë me një djalë që e njoh shumë mirë. Ai nuk bën shaka kur flet për përdorimin e mundshëm të armëve bërthamore taktike apo armëve kimike apo biologjike, sepse ushtria e tij po ecën shumë keq. Dhe jo se mendoj se ekziston aftësia për të përdorur një armë taktike atomike, pa përfunduar në një Harmagedon”.
Presidenti amerikan qartësisht evokon duelin përfundimtar midis “të mirës dhe së keqes” në një ditë para Gjykimit, të përshkruar në Dhiatën e Re.
Fjalimi i tij u publikua vonë në mbrëmje në Uashington.
Do të shohim në vazhdim nëse zëdhënësit e Shtëpisë së Bardhë do të përpiqen, siç ka ndodhur shpesh që nga fillimi i luftës, të zbehin apo të “kontekstualizojnë” fjalitë e presidentit.
Prej disa muajsh zyrtarët amerikanë kanë paralajmëruar se Rusia mund të përdorë armët e shkatërrimit në masë, nëse do të pësonte pengesa në fushën e betejës në Ukrainë.
Putin ka kërcënuar gjithashtu se do të përdorë çdo mjet që ka në dispozicion për të mbrojtur territorin rus. Ai gjithashtu e ka bërë të qartë se i konsideron katër rajonet ukrainase të aneksuara ilegalisht nga Moska si “territore të reja” të Federatës Ruse.
Ndërkohë Sekretari i Shtetit Anthony Blinken, bëri një hapje drejt rrugës së diplomacisë në një deklaratë për konferencë shtypi nga kryeqyteti i Perusë, Lima, ku ndodhet për vizitë zyrtare.
Blinken tha se vendi i tij ishte “gati” të kërkonte një zgjidhje diplomatike me Rusinë për konfliktin në Ukrainë, por shprehu keqardhje që Moska po shkonte “në drejtim të kundërt”.
“Kur Rusia të tregojë seriozisht vullnetin e saj për të marrë rrugën e dialogut, ne do të jemi gati. Ne do të jemi atje”, vazhdoi Blinken.
Megjithatë, shefi i diplomacisë amerikane siguroi se “për fat të keq, për momentin, gjithçka është duke vajtur në drejtim të kundërt”. Blinken përmendi si shembuj mobilizimin e rezervistëve, tentativën për aneksimin e territorit ukrainas dhe kërcënimet bërthamore të presidentit rus Vladimir Putin. “Fakti është se Rusia dhe presidenti Putin nuk kanë treguar interes për diplomacinë”, tha ai.
Megjithatë, ai shtoi se si Shtetet e Bashkuara ashtu edhe presidenti ukrainas Volodymir Zelensky kanë thënë prej kohësh se lufta “mund të zgjidhet vetëm përmes diplomacisë”.