Mish pule me salmonelë, bllokohen 2130 kg në Vlorë

Autoriteti Kombëtar i Ushqimit ka bllokuar në Vlorë një sasi prej 2130 kg produkt mish pule me salmonelë ardhur nga Polonia.

Drejtoria Rajonale e AKU Vlorë, pas marrjes së informacionit nga sistemi RASFF (Sistemi i informimit të shpejtë për ushqim dhe ushqim për kafshë), për prani mikrobiologjike në një ngarkesë me produkt “mish pule” me origjinë nga Polonia, kreu menjëherë kontrollin në subjektin me aktivitet “Tregtimin e produkteve dhe nënprodukteve të qumështit dhe tregtimin e produkteve dhe nënprodukteve të mishit”.

Ngarkesa me produktin “Mish pule” në sasinë prej 2130 kg i papërpunuar, i paketuar në kuti kartoni 10 kg dhe i ngrirë në temperaturë -18 °c, rezultoi pas kryerjes së analizave me prezencë salmonelë jashtë çdo standardi për konsumim. Pas konstatimit AKU kreu procedurën e bllokimit të produktit deri në marrjen e masave për asgjësimin e tij.

AKU bllokon alkool dhe produkte mishi jashtë standardeve

Autoriteti Kombëtar i Ushqimit ka bllokuar 1,267 litra pije alkoolike (raki, verë dhe konjak) ndërsa ka vendosur edhe masa administrative ndaj dy subjekteve në Elbasan.

AKU kreu 26 kontrolle në bizneset ushqimore në Elbasan, që tregtonin produkte me origjinë shtazore, jo shtazore dhe produktet e mbrojtjes së bimëve. Ndaj dy bizneseve janë marra masa administrative paralajmëruese, ndërsa janë marrë edhe 6 mostra për kryerjen e analizave laboratorike për pijet alkoolike.

Masa “Bllokim Produkti” u vendosu për 1,267 litra pije alkoolike (raki, verë dhe konjak) dhe pritet të qëndrojnë të bllokuara deri në daljen përfundimtare të përgjigjeve të analizave.

Autoriteti Kombëtar i Ushqimit ka zhvilluar aksion edhe në Kavajë, ku ka bllokuar 2 subjekte që tregtonin mish, ka gjobitur 6 të tjera me gjoba me vlerë 800,000 lekë në total si dhe ka bllokuar 183.2 kg mish dhe qofte të pasigurta për konsum. Disa nga shkeljet e konstatuara nga kontrollet ishin: tregtimi i mishit pa vulë dhe pa certifikatë veterinare, produkte pa etiketë, dhe në kushte të papërshtatshme higjeno-sanitare

Kapen 27 tonë fileto pule me salmonelë nga Brazili, çanë në 3 supermarkete

Auriteti Kombëtar Ushqimor ka bllokuar 27 tonë fileto pule me salmonelë që vinte nga Brazili në portin e Durrësit. AKU gjithashtu ka ndaluar futjen në treg të 46.2 tonë produkte të pasigurta nga Brazili si dhe ka ndëshkuar me 5.25 milione lekë kundravajtjet ligjore në 3 supermarkete në Tiranë.

“Ne Durrës u ushtrua kontroll në dy ngarkesa me produkte importi, të dyja me origjinë nga Brazili dhe destinacion Shqipërinë , nga ku rezultoi: 27 tone “Fileto pule” me ngarkesë mikrobiologjike (Salmonella app)”- njofton AKU.

Gjithashtu janë bllokuar edhe 19.2 ton kafe kokërr e papjekur, pasi rezultonte me mangësi në dokumentacionin shoqërues.

“Për shkeljet e konstatuara, trupa inspektuese mori masat administrative si në vijim: 9 masa administrative “Gjobë” me vlerën totale 5.25 milion lekë për 3 subjektet, “Tërheqja e menjëhershme e produktit nga tregu” me destinacion asgjësimin për produktin oriz të importuar në kundërshtim me ligjin, si dhe “Kthimi në vendin e origjinës” për 46.2 ton produkte importi të vlerësuar si të pasigurta për konsum human”, njofton AKU.

Mish i pasigurt, AKU gjoba dhe mbyllje biznesi për tre subjekte

Autoriteti Kombëtar i Ushqimit ka njoftuar këtë të shtunë se ka bërë bllokimin e disa dhjetra kilogramëve mish i pasigurt për konsumatorët. Sipas një komunikate për mediat, AKU njofton se ka gjobitur tre subjekte me një gjobë në vlerë totale prej 1.1 milion lekësh, ndërsa është ndërprerë aktiviteti i dy subjekteve. Konkretisht, AKU njofton se subjekti Llazar Vezuli me aktivitet njësi tregtimi në Leskovik, ushtronte aktivitetin në kushte të papërshtatshme higjeno-sanitare. Ky subjekt kishte mungesë librezash shëndetësore të punonjësve. Ndaj, për shkeljet e gjetura, ky subjekt është gjobitur me 300 mijë lekë, duke i ndërprerë në mënyrë të menjëhershme aktivitetin.

Ndërkohë, në fshatin Sotirë të Korçës, subjekti Jeton Hida, kishte ngritur një aktivitet kampingu. Gjatë inspektimit nga AKU, në aktivitetin e këtij shtetasi u gjetën shkelje të kushteve higjeno-sanitare në kuzhinë dhe në dhomat frigoriferike.

Në këtë aktivitet është bërë bllokimi i 21 kg salcë dhe produkte mishi pa vulë, është sekuestruar një sasi prej 20 kg mish qingji, 34 kg mish lope, 38 kg mish derri dhe 34 kg të brendshme lope. Për shkeljet e konstatuara, trupa inspektuese mori masat administrative me gjobë në vlerën e 500 mijë lekëve, ndërsa është sekuestruar në total 147 kg mish i pasigur që do të asgjësohet.

Ndërkohë, subjekti Ermir Çollaku me aktivitet “Piceri” në Pogradec, ushtronte aktivitetin në kushte higjeno-sanitare të papërshtatshme, mjete dhe pajisje të amortizuara, të papastruara dhe të pahigjienizuara, prani papastërtish në ambientin e kuzhinës, muret e dyshemeja të papastra, mungesë çertifikate dhe prani insektesh në rafte dhe në tavolinën e punës. Për shkeljet e konstatuara, trupa inspektuese mori masat administrative të gjobës me vlerë prej 300 mijë lekësh dhe ndërprerje të menjëhershme të aktivitetit.

AKU bllokon 27 ton mish pule nga Brazili, mbyll dy biznese

Aksioni për sigurinë ushqimore ka çuar në bllokimin e 27.6 tonë mish pule të ardhur nga Brazili, ndërsa dy biznese janë mbyllur nga AKU dhe 3 biznese janë gjobitur me një shumë prej 3.5 milionë lekë gjobë. Aksioni u zhvillua në qarkun Korçës, Fierit dhe Shkodrës , ku AKU ushtroi kontrolle në 3 subjekte, me aktivitet “Prodhim, përpunim, ambalazhim, etiketim të salcave të ndryshme dhe produkteve me origjinë të përzier”, “Supermarket” dhe “Njësi prodhim, tregtim buke dhe Mëngjesore”.

AKU konstatoi një ushtrim aktiviteti i palicencuar, që punonte në kushte të papërshtatshme higjieno-sanitare, me mangësi në dokumentacion (gjurmueshmëri, plani HACCP), veprim në kundërshtim me përgjegjësitë e operatorit të biznesit, tregtim i produkteve me afat përdorimi të kaluar, si dhe etiketim i produkteve jo konform ligjit. Ndërsa në Durrës u ushtrua kontroll në një ngarkesë me sasi totale 27 ton “mish pule” me origjinë nga Brazili dhe destinacion Shqipërinë, e cila rezultoi me mangësi në dokumentacionin shoqërues (pavlefshmëri të certifikatës veterinare).

Për shkeljet e konstatuara, trupa inspektuese mori masat administrative: 10 masa administrative “Gjobë” me vlerën totale 3.5 milion lekë për 3 subjektet, “Ndërprerja e aktivitetit” për 2 subjekte, si dhe “Bllokim i produktit” për 27.642 ton produkte të pasigurta , ku 27 ton produkt “mish pule” nga Brazili me mangësi në dokumentacion, për të cilat u vendos kthimi në vendin e origjinës, si dhe 642 kg produkte me afat përdorimi të kaluar dhe etiketim jo konform ligjit të konstatuara brenda territorit.

Mish i kontaminuar me salmonelë, AKU bllokon mbi 387 tonë

Autoriteti Kombëtar i Ushqimit ka ndaluar hyrjen e 387.1 tonë produkte ushqimore mishi të kontaminuar me salmonelë. Produktet që vinin nga Brazili, Kanadaja dhe Qipro, në bazë të analizave laboratorike kanë rezultuar të papërshtatshme për konsumimin dhe janë kthyer mbrapsht. Konkretisht, AKU ka kthyer 234.5 tonë mish të kontaminuar me salmonelë dhe është në proces kthimi edhe për 152.6 tonë mish të tjera.

AKU i zhvilloi këto kontrolle në portin e Durrësit në ngarkesat e importit që ishin gati për t’u shpërndarë për konsumim njerëzor në vend.

Tre ngarkesa me sasi totale 74.946 ton “Mish Derri” me origjinë nga Kanadaja, importuar nga subjekti “FRIGO ALB shpk”, rezultuan se nuk përmbushin kërkesat ligjore të sigurisë ushqimore dhe kishin mangësi në besueshmërinë e dokumentacionit shoqërues (kryesisht të certifikatës veterinare si dokumenti kryesor i sigurisë së produktit si dhe certifikatat e analizave raportonin prezencë Ractopaminë, një produkt mjekësor veterinar i paregjistruar dhe i ndaluar për përdorim në Shqipëri dhe në BE)

Dy ngarkesa me sasi totale 52.257 ton “Mish Viçi” me origjinë nga Brazili, importuar nga subjekti “Apetit shpk”, në regjim transit në territorin e Shqipërisë me destinacion final Kosovën, rezultuan me mangësi dhe mospërputhje thelbësore në dokumentacionin shoqërues të mallit (certifikata e origjinës dhe ajo veterinare mbanin të dhëna të ndryshme nga dokumenti i transportit dhe fatura komerciale) çka e bën mallin ushqimor të importuar pa identitet të konfirmuar dhe të pasigurt për konsum.

Më herët, analizat e kryera për disa nga ngarkesat me produkte ushqimore mish të importuar rezultuan me ngarkesë mikrobiologjike (analizat laboratorike raportuan prezencën e Salmonella spp) dhe si rrjedhojë, produkti ushqimor i importuar me këto ngarkesa është i pasigurt dhe i papërshtatshëm për konsum njerëzor. Për ketë arsye dhe referuar bazës ligjore dhe rregullator në fuqi, Autoriteti Kombëtar i Ushqimit vendosi kthimin e këtyre ngarkesave në vendin e origjinës, më konkretisht:

Katër ngarkesa me sasi totale 107.240 ton “Mish derri” me origjinë nga Brazili, importuar nga subjekti “ZICO sh.a.” është finalizuar praktika dhe ngarkesat janë kthyer në vendin e origjinës.

Gjashtë ngarkesa (152.631 ton në total) janë në proces përmbyllje praktike për kthimin ne vendin e origjinës ose asgjësim.

Shkelën sigurinë ushqimore, AKU u vë kyçin tre restoranteve në Fier e Durrës

Autoriteti Kombëtar i Ushqimit ka goditur disa raste të tjera, të bizneseve që vepronin në kushte të jashtëligjshme dhe në shkelje të kushteve hijeno-sanitare. Sipas një njoftimi publik, AKU njofton se ka gjobitur dhe bllokuar aktivitetin e disa subjekteve, pasi janë kapur në shkelje të rënda ligjore. Kështu, sipas AKU, në Lushnje është gjobitur një biznes, “Magazinë ushqimore me shumicë”, e cila ushtronte aktivitetin pa licencën përkatëse, dhe për më tepër, në këtë magazinë janë gjetur produkte të skaduara, si: çajra, kotej, biskota, akullore, amareta etj.

Ndaj këtij subjekti është vendosur një gjobë me vlerë 2.6 milion lekë, ndërsa është ndërprerë aktiviteti deri në plotësimin e kushteve. Në qytetin e Fierit, sipas AKU, i është ndërprerë aktiviteti subjektit “Dorjan Gjoka”, që kishte një restorant pa pasur liçencën përkatëase. Veç ndalimit të aktivitetit, ndaj këtij subjekti është vendosur dhe një gjobë prej 1.5 milion lekësh.

Po në qytetin e Fierit, për të njëjtat arsye si personit subjektit të mësipërm, i është ndërprerë aktiviteti dhe gjobitur me 1.5 milion lekë gjobë, shtetasit Artur Bocova. Ndërkohë, në qytetin e Durrësit, shtetasit Shpëtim Turku, AKU i ka bllokuar aktivitetin e restorantit të tij, pasi nuk përmbushte kushtet hijeno-sanitare. Ndaj këtij subjekti është vendosur edhe një gjobë prej 600 mijë lekësh. Sipas AKU, këto mjasa kanë ardhur në kuadër të rritjes së sigurisë ushqimore gjatë sezonit turistik në vend.

Bllokohen 3 biznese në Himarë, punonin mes mykut dhe pa licencë

Autoriteti Kombëtar i Ushqimit ka vijuar kontrollet në Himarë për të garantuar sigurinë ushqimore duke shmangur çdo abuzim në dëm të shëndetit të konsumatorëve. Gjatë inspektimit AKU ka bllokuar tre biznese në Himarë për shkak të mungesës së licencës, kushteve higjieno-satinare, produkteve të paetiketuara dhe prezencës së mykut.

AKU ka mbyllur një ushqimore dhe furrë buke që nuk përmbante licencën përkatëse, pa plan për manualin e vetëkontrollit. Aktiviteti ushtrohej në kushte të papërshtatshme higjieno-sanitare me një dysheme të dëmtuar dhe të çarë si dhe prezencë myku në mure dhe u sekuestrua një sasi prej 33 kg mocarela të paetiketuara. Për shkeljet e konstatuara u bllokua biznesi deri në plotësimin e kushteve dhe u vendos një gjobë prej 1.550.000 lekësh. Biznesi i dytë është një market ushqimor dhe ushtronte aktivitetin e pa pajisur me licencën përkatëse, pa sistemin e gjurmueshmërisë, pa planin me manualin e vetëkontrollit si dhe u konstatua një sasi prej 39 kg gjalpë e paetiketuar. Për shkeljet e konstatuara trupa inspektuese u bllokua aktiviteti i biznesit dhe u vendos një gjobë prej 1.200.000 lekësh.

AKU ka mbyllur edhe një Fast Food, që ushtronte aktivitetin i pa pajisur me licencën përkatëse, në kushte të papërshtatshme higjieno-sanitare, ku tualeti ishte në një ambient me prodhimin, pa sistemin e gjurmueshmërisë dhe pa planin me manualin e vetëkontrollit. U gjet gjithashtu edhe sasia prej 80.5 kg djathë kaçkavall dhe 60 kg gjizë të paetiketuara. Për shkeljet e konstatuara trupa inspektuese u vendos bllokimi i aktivitetit, bllokimi i 140.5 kg produkte ushqimore dhe një gjobë prej 1.100.000 lekësh.

Punonin si restorant me leje për “fast food”, AKU gjoba të majme disa subjekteve

Autoriteti Kombëtar i Ushqimit ka marrë masa të ashpra ndaj disa subjekteve që ofronin shërbime në fushën e ushqimit. Konkretisht, AKU ka mbyllur një Restorant në Spille, me pronar Ardian Dyrmishin, pasi sipas njoftimit zyrtar, ky subjekt ushtronte aktivitetin i papajisur me licence përkatëse. Në këto kushte, AKU i ka vendosur një gjobë prej 2.2 milion lekësh këtij subjekti, duke i ndërpreë njëkohësisht dhe aktivitetin.

E njëjta masë është marrë edhe ndaj subjektit “Fish Store” në Tiranë, që ushtronte aktivitetin si restorant i papajisur me licence përkatëse. Ndaj këtij subjekti është vendosur një gjobë prej 2.2 milion lekësh, duke ndërpreë njëkohësisht edhe vazhdimin e aktivitetit.

Subjekti “Ilmi Sinani” me aktivitet “Magazinë Ushqimore”, Lushnjë, ushtronte aktivitetin i papajisur me licencën përkatëse, pa patur dhe zbatuar sistemin e gjurmueshmërisë dhe pa manual vetëkontrolli. Për shkeljet e konstatuara, këtij subjekti i ëhstë vendosur një gjobë prej 1.2 milion lekësh, duke i ndërperë dhe aktivitetin.

Po në Lushnjë, ndaj subjektit Novruz Uka, me aktivitet një magazinë ushqimore, është marrë masa e gjobës prej 1.3 milion lekësh si dhe ndërperje e aktivitetit, pasi edhe ky subjekt ushtronte aktivitetin pa pasur licencë përkatëse.

AKU asgjëson 7.6 ton mish të skaduar, që gjykata i ktheu për konsum publik

Rreth 7.6 ton produkte ushqimore të skaduara që në vitin 2015, ku përfshiheshin mish i ngirë dhe i destinuar për t`u bërë sallam, janë asgjësuar të premten në Sarandë nga Autoriteti Kombëtar i Ushqimit dhe Inspektorati i Mjetidisit në bashkinë e qytetit jugperëndimor. Këto produkte u bllokuan në datën 27 korrik nga AKU, por tre ditë më vonë, Gjykata Administrative e Shkallës së Parë në Sarandë rrëzoi konfiskimin, duke lejuar subjektin tregtar që të përdorte këto produkte për prodhimin e sallamit.

“Më datë 31 Korrik 2019, një ditë pas regjistrimit të çështjes, Gjykata Administrative e Shkallës së Parë Gjirokastër ka vendosur heqjen e bllokimit mbi aktivitetin e palicencuar (marrje mase sigurimi). Në të njejtën ditë me vendimin e Gjykatës, Zyra Përmbarimore Sarandë ka nxjerrë Urdhërin për “Masën e Sigurimit të Padisë”, me kërkesë të subjektit të konstatuar në shkelje nga AKU”.

“Zyra e Përmbaruesit Sarandë ka prishur vulat e sigurisë të vendosura nga AKU, duke kryer zhbllokimin e produkteve nga rregjimi “Bllokim me destinacion asgjësim”, me veprime proceduriale ekstra-ligjore (pa njoftuar zyrtarisht, as mbi vendimin gjyqësor dhe as mbi veprimet proceduriale, institucionin dhe pa prezencën e përfaqësuesve të tij)”, thuhej në një njoftim të datës 1 gusht të AKU.

Kjo çështje nxiti një reagim të madh publik, deri te zëvendës Kryeministri Erion Braçe. Në këto kushte, kur rrezikohej hedhja e produkteve të skaduara të mishit në treg apo përpunimi i tyre për sallam, duke i vendosur një datë të re skandence, AKU mori vendimin për të ribllokuar në kushtet e flagrancës këtë sasi produktesh. Të premten pasdite të 2 gushtit, Autoriteti Kombëtar i Ushqimit ka bërë dhe asgjësimin e këtyre produkteve, duke i groposur në tokë.