Tag: meta basha

Presidenti Ilir Meta ka risjellë të hënën një deklaratë të bërë prej tij, gati një vit më parë, më 27 qershor të vitit 2018, ku bënte apel për bashkëpunim politik në mënyrë që vendi të fitonte çeljen e negociatave nga BE.

Pas një viti, presidenti Meta bën të njëjtin apel drejtuar partive politike në vend, ndërsa shkruan se u shpërdorua një vit pa bashkëpunim.  

“Po ju rikujtoj qëndrimin tim publik në 27 qershor 2018, një ditë pasi ishin bërë të njohura konkluzionet e Këshillit për Çështjet e Përgjithshme mbi negociatat e anëtarësimit të Shqipërisë me Bashkimin Europian!

Jo vetëm që u shpërdorua një vit pa bashkëpunim, përqëndrim e përgjegjësi, por gjithçka u përkeqësua vetëm në interes të luftës për pushtet”, shkruan Presidenti në facebook.

Sipas Metës zgjidhja për këtë situatë janë zgjedhjet e 13 tetorit, një mundësi që ai u ka dhënë palëve për të dalë nga kjo situatë. Një zgjidhje kjo që sipas Metës duhet shfrytëzuar që vendit t’i hapen negociatat më 18 tetor.

“Ndërkohë kanë kaluar më shumë se dy muaj nga dita kur u dhashë mundësi të dy palëve për të realizuar zgjedhje vendore gjithëpërfshirëse.

Ende kemi mundësi t’i shfrytëzojmë këto ditë, për të realizuar zgjedhje në 13 tetor 2019, si një detyrim, jo vetëm ligjor, por edhe si domosdoshmëri për të mos i mbajtur zero shanset që Shqipëria t’i çelë negociatat për anëtarësim me BE në 18 tetor 2019.

Askush të mos lodhet të gjejë justifikime dhe alibi nëse nuk reflekton. Çdo gjë mund të lobohet në BE, por jo injorimi i kritereve të Kopenhagenit. Zgjedhjet e lira e të ndershme janë pjesë e tyre dhe të paevitueshme.

Ndaj duhet shfrytëzuar urgjent gatishmëria e drejtuesve të OSBE-së për të ndihmuar në tejkalimin e kësaj krize duke e pranuar këtë gatishmëri tani, me qëllim që jo vetëm të realizohen zgjedhjet vendore në 13 tetor 2019, por edhe të arrihet marrëveshja për reformën zgjedhore sa më parë, në mënyrë që vendi ynë të ketë mundësi të çelë negociatat në 18 tetor 2019”, shkruan Meta.

Propozimi i Metës për zgjedhje më 13 tetor përveçse është i vjetër, antikushtetues është edhe një propozim që nuk ka gjetur mbështetje jo vetëm nga maxhoranca por edhe nga partia më e madhe në opozitë, Partia demokratike. Kreu i PD-së, Lulzim Basha vetëm pak ditë më herët tha në një konferencë për shtyp se PD nuk do të marrë pjesë në zgjedhjet e 13 tetorit, duke theksuar se asnjë parti politik nuk bën ndonjë shkelje të kushtetutës duke refuzuar të mos marrë pjesë në zgjedhje. Edhe maxhoranca nga ana e saj i ka vënë kapak njëherë e mirë çështjes së zgjedhjeve. Për të zgjedhjet u zhvilluan më 30 qershor dhe u njohën nga ndërkombëtarët. Rama është shprehur i gatshëm të bisedojë për reformën zgjedhore dhe për asgjë tjetër. Meta ka vetëm mbështetjen e Kryemadhit dhe të Mediut në propozimin e tij për zgjedhje në 13 tetor dhe të askujt tjetër. Por edhe kjo datë është antikushtetuese njëlloj si anulimi i 30 qershorit dhe e rrëzuar nga Kolegji Zgjedhor, ndërkohë që KQZ as që e mori mundimin ta shqyrtonte për shkak se është nul. Kështu që presidenti i mbetur vetëm në përpjekjen e tij për t’u bërë kryenegociator, vijon të fitojë sado pak protagonizëm politik në këto ditë të nxehta gushti me propozime të vjetra të bëra nga Prevalla ku ai po kalon disa ditë pushimesh larg Tiranës./Realstory.al

Presidenti Ilir Meta me refleksionin politik të së enjtes, ka marrë i vetëm flamurin e drejtimit të opozitës duke i bërë dalje Bashës dhe thirrjeve të tij për largimin e Ramës.

Meta shkruan nga lartësitë e Prevallës ku ndodhet prej disa ditësh për të bërë pushime por që në fakt i kanë shërbyer si ditë për të qenë më aktiv dhe më opozitarë se kurrë ndaj qeverisë, se opozita nuk mund të presë që Rama të ikë vetë, por duhet të përballet më të dhe duhet ta mundë përmes zgjedhjeve.

Madje presidenti shkon më tej duke sjellë si shembull Millosheviçin dhe duke bërë një krahasim me largimin e tij dhe përfundimin në Hagë.

“Zgjedhjet janë e vetmja zgjidhje. Vetëm duke qëndruar në anën e ligjshmërisë dhe pjesëmarrjes në institucione, opozita mund të ndihmojë vendin, demokracinë, drejtësinë, por edhe vetveten. Nëse opozita në Serbi do të priste që Millosheviçi të dënonte Millosheviçin, apo të garantonte zgjedhje të lira e të ndershme, padyshim që edhe sot e kësaj dite ai mund të ishte në pushtet po të mos i pushonte zemra”, shkruan Meta.

Me retorikën e drejtuesit të opozitës Presidenti i cili duhet të ishte mbi palët bën thirrje që opozita të bashkohet për të mundur Ramën. Ai shkruan se bojkoti është bashkëfajësi, duke sulmuar hapur Bashën.

“Por opozita mori vendimin më të drejtë duke u bashkuar, duke u përballur me të dhe duke e mundur. Më pas i vuri prangat dhe e përcolli për në gjykatën e Hagës. Ndaj zgjedhjet janë e vetmja zgjidhje për demokraci dhe drejtësi. Çdo gjë tjetër është justifikim, alibi dhe bashkëfajësi! 18 tetori po afron!”, kështu shkruan Meta këtë të enjte.

Një deklaratë kjo që shigjeton hapur kreun e PD-së, Basha. Rruga e zgjedhur prej Bashës, bojkoti dhe thirrjet që Rama të lërë pushtetin, nuk janë të duhurat sipas Metës. Bojkoti në zgjedhje e nxorri PD-në në rrugë dhe e la pa asnjë pushtet. Ndërsa kreu i PD-së vijon ende të mendojë për protesta dhe refuzon të futet në zgjedhje. Por tani opozitën e drejton Meta dhe zgjidhja sipas tij janë zgjedhjet e 13 tetorit. Opozita sipas tij, duhet të bashkohet nën thirrjen e Metës dhe të përballet me Ramën në zgjedhje. Thirrje këto të presidentit nuk lënë vend për dyshime, ai tashmë tund i vetëm flamurin e drejtimit të opozitës, ndërsa Bashës i duhet të merret me partinë dhe kritikët brenda PD-së ndaj vijon pa ndërprerje turin në çdo degë. Në shtator nis lëvizja “Basha ik”, por Meta duket se e nisi para kohe./Realstory.al

Presidenti Ilir Meta në refleksionin politik të së martës shkruan se “e vetmja zgjidhje janë zgjedhjet”. Kjo deklaratë e bërë nga njeriu që anuloi zgjedhjet e 30 qershorit në mes të procesit, duket si një përpjekje e tij për t’i mbushur mendjen Bashës që të regjistrohet në KQZ, ashtu sikurse bëri Kryemadhi e Mediu, dhe të ushtrojnë presion për të zhvilluar zgjedhje në 13 tetor, një datë e firmosur në mënyrë antikushtetuese prej Metës.

“Pa zgjedhje nuk ka demokraci. Pa demokraci nuk ka drejtësi të pavarur. Pa të dyja së bashku nuk ka të drejta dhe ekonomi për të gjithë shqiptarët. Dhe as ndëshkim për politikanët.

Moszgjidhja i shërben vetëm pakicës që nuk njeh rotacion dhe nuk e do çeljen e negociatave të Shqipërisë me Bashkimin Europian, pasi ka për të humbur gradualisht pushtetin e paligjshëm politik, ekonomik dhe mediatik. 18 tetori po afron!”, shkruan Meta.

Ndërsa Basha, ndryshe nga Meta, tha të hënën se “zgjidhja e krizës kalon nga politikanë me pranga në duar!”.  Ndryshe nga Kryemadhi e Mediu Basha nuk u regjistrua në zgjedhjet e 13 tetorit (pasi data 5 gusht ishte afati i fundit), megjithëse bëri një përpjekje të hënën për t’u dukur se nuk është vetëm dhe se i mbështet aleatët, teksa kërcënoi KQZ-në të nisë përgatitjet për zhvillimin e zgjedhjeve në respekt të dekretit të presidentit.

“I vetmi akt me fuqi kushtetuese në lidhje me zgjedhjet është dekreti i Presidentit për zhvillimin e zgjedhjeve më 13 tetor. Është detyrim i pashmangshëm dhe i padiskutueshëm i KQZ-së dhe institucioneve të tjera shtetërore të përgatisin infrastrukturën për këto zgjedhje”, tha Basha të hënën por ndryshe nga aleatët e tij, ai nuk depozitoi asnjë kërkesë në KQZ për t’u regjistruar në zgjedhje, çka e bën këtë deklaratë të tij të pavlerë, të bërë vetëm për konsum politik.

Qëndrimi i Bashës kundër dekretit të Metës ka sjellë krisjen e marrëdhënieve të tyre. Ndërkohë që para 30 qershorit, ata bashkëpunonin si dy aleatë, tani ndajnë qëndrime të ndryshme. Meta kërkon të bëhet faktor në zgjidhjen e krizës në vend. Por Basha e refuzon. Ai nuk e sheh Metën si negociator. Nuk pranon zgjedhjet në 13 tetor për shkak se i trembet edhe reagimit të partisë së tij, pasi u premtoi se s’ka zgjedhje me Ramën kryeministër dhe pa një qeveri teknike dhe nëse pranon të futet në zgjedhje pa mbajtur këto dy premtime rrezikon largimin nga posti i kryetarit. Realstory ka shkruar më herët se në shtator zërat kritikë brenda PD-së do të nisin lëvizjen “Basha ik”. Ndoshta zgjidhja për krizën në vend mund të vijë pas zgjidhjes që do të japë lëvizja “Basha ik” në PD./Realstory.al