Të arrestuarit nga policia për vepra të ndryshme penale kanë dalë kundër opozitës dhe Presidentit Meta, të cilët deklarojnë se nuk ka zgjedhje më 30 qershor. Të burgosurit e kanë njohur 30 qershorin dhe kanë kërkuar leje në gjykatë për të votuar në vendin, ku mbahen të izoluar nga organet e drejtësisë.
Kur kanë mbetur vetëm pak ditë nga zgjedhjet e 30 qershorit, rezulton se 25 persona të cilët qëndrojnë në paraburgimin e burgut 313 në kryeqytet, kanë paraqitur pranë Gjykatës së Tiranës kërkesën për të marrë pjesë si votues në zgjedhje. Kjo nuk është kërkesa e vetme nga të arrestuarit, pasi sipas të dhënave nga Drejtoria e Përgjithshme e Burgjeve, kërkesa të tilla janë paraqitur nga të burgosurit edhe në zona të tjera.