Policia e Tiranës goditi dy raste të mitëdhënies ndaj punonjësve të Policisë Rrugore. Në funksion të patrullimeve në zona të ndryshme të Tiranës, rrugorët e kryeqytetit kanë ndaluar në rrugën “Ndre Mjeda” drejtuesin e mjetit me iniciale F. M., 58 vjeç. Ai po drejtonte mjetin pa vendosur rripin e sigurisë dhe gjatë kontrollit policor, me qëllim shmangien e penalizimit, ai i ka ofruar agjentit verifikues një shumë lekësh.
Gjithashtu, në rrugën “Konferenca e Pezës” është ndaluar drejtuesi i mjetit me iniciale Xh. T., 21 vjeç, i cili i ka ofruar agjenti verifikues të qarkullimit një shumë lekësh, me qëllim mosvijimin e procedurave administrative ndaj tij.
Në të dy rastet, efektivët e Policisë Rrugore kanë bërë arrestimin e dy drejtuesve të mjeteve në kushtet e flagrancës, për veprën penale “Korrupsioni aktiv ndaj personave që ushtrojnë funksione publike” dhe janë bërë procedurat administrative për kundërvajtjet e konstatuara.
Të gjitha skenat janë filmuar nga kamerat e punonjësve të Policisë Rrugore, teksa janë bërë publike dhe për qytetarët. Në pamje dëgjohet dialogu mes punonjësit të policisë dhe drejtuesit të mjetit, si dhe shuma e parave që i ofrohet efektivit të qarkullimit, me qëllim shmangien e masave administrative.
