Tag: BE

Diplomatët e BE në një zë për protestën: Të jetë paqësore, autoritetet jo pre e provokimeve

Delegacioni i Bashkimit Europian dhe Ambasadave të Shteteve Anëtare të Bashkimit Evropian në Shqipëri kanë dhënë një deklaratë të përbashkët për protestën e sotme.

Në mesazhin e tyre BE dhe Ambasadat e Shteteve Anëtare shprehen në një zë për të zhvilluar një protestë paqësore duke dënuar edhe njëherë çdo akt dhune që është përdorur në protestat e mëparshme.

Diplomatët europian i bëjnë thirrje udhëheqësve të opozitës të sigurojnë që protesta të zhvillohet në mënyrë paqësore, ndërsa autoriteteve ligjzbatuese u kërkohet të mos bien pre e provokimeve.

“Delegacioni i Bashkimit Evropian dhe Ambasadat e Shteteve Anëtare të Bashkimit Evropian në Shqipëri respektojnë plotësisht të drejtën themelore të qytetarëve të Shqipërisë për të demonstruar. Megjithatë, ne përsërisim rëndësinë e ushtrimit të kësaj të drejte në mënyrë paqësore.
Ne dënojmë aktet e dhunës që kanë ndodhur në protestat e mëparshme dhe u bëjmë thirrje udhëheqësve të protestës si dhe autoriteteve shqiptare që të sigurojnë që demonstrata e sotme të zhvillohet në mënyrë të rregullt dhe paqësore. Të gjitha palët e përfshira kanë përgjegjësinë për të garantuar sigurinë e atyre që janë në rrugët e Tiranës sonte. Nuk ka vend për dhunë në një protestë paqësore. Autoritetet e zbatimit të ligjit kanë përgjegjësinë për të vepruar me vetëpërmbajtje, edhe nëse provokohen.
Për të mirën e qytetarëve shqiptarë, shumica e të cilëve dëshiron të shohë që vendi të bëjë përpara me procesin e reformave dhe të ecë drejt anëtarësimit në Bashkimin Evropian, ne i bëjmë thirrje të gjitha palëve të mbështeten në ofertën ekzistuese për dialog me synimin për të gjetur një rrugëdalje nga situata aktuale politike si një çështje urgjente.”- shkruhet në deklaratë

Serbia, Veseli kërkon ndihmën e BE dhe SHBA për negociatat finale

Kryetari i Kuvendit të Kosovës Kadri Veseli i ka kërkuar Bashkimit Europian të ushtrojë presion ndaj Serbisë, në mënyrë që Beogradi të mos ndërhyrjë  në Kosovë përmes Listës Serbe. Veseli ka folur në një intervistë për ABC News, duke deklaruar se ndërhyrja e Serbisë në Kosovë është flagrante dhe që nuk ndihmon stabilitetin e Ballkanit.

“Influencës që domonstron Serbia në Kosovë, ky është shqetësim që do ta adresojmë te Bashkimi Evropian. Është ndërhyrje flagrante, dëmtuese që nuk është duke i ndihmuar stabilitetit në Ballkanit Perëndimor”.

Lidhur me negociatat mes Kosovës dhe Serbisë, kreu i Kuvendit të Kosovës u shpreh se qëndrimi do të jetë në mbrojtje të sovranitetit territorial.

“Në një rezolutë të cilën e ka nxjerr OKB-ja përgjegjësinë mes dialogut të Kosovës dhe Serbisë e ka bartur te Bashkimi Evropian. Brukseli nuk është qendër vetëm e Belgjikës, por e gjithë BE-së. Qëndrimi do të jetë shumë i qartë në interes në mbrojtje të sovranitetit dhe integritetit territorial”.

“Nuk është Kosova që i përcakton kushtet e dialogut, ku dhe si do të zhvillohen. Unë pres që BE-ja të ketë një involvim dhe kërkesë e jona është që SHBA-ja të jetë thellë dhe bindshëm në këtë proces”, ka thënë ndër të tjera Kadri Veseli.

Danezët, kundër vendeve të Ballkanit në BE

Danezët janë kundër zgjerimit të BE-së. Ky është rezultati i një sondazhi të realizuar nga Instituti i Statistikave në Danimarkë, pikërisht në kohën kur integrimi në Bashkimin Europian është kthyer në një mision për Shqipërinë, Malin e Zi, Maqedoninë e Veriut, Serbinë dhe Turqinë.

Sipas sondazhit, 46% e të anketuarve treguan se ishin kundër zgjerimit të mëtejshëm të BE-së. Ndërsa vetëm 20% votuan pro. “Zgjerimi ka çuar në një BE më të madhe dhe më shumë stabilitet në rajonin e Ballkanit, por lëvizja e lirë nuk ka sjellë gjithmonë ndryshime pozitive, të tilla si në lidhje me Rumaninë”, deklaroi Peter Nedergaard, profesor në shkencat politike në Universitetin e Kopenhagenit. “Shumë rumunë po sillen mirë, por ka edhe disa që nuk e bëjnë këtë gjë. Për shembull, ka histori rreth bandave të hajdutëve që grabisin dhe pastaj kthehen në shtëpi. Është e pamundur që njerëzit të kenë frikë të shtojnë Islandën ose Norvegjinë, por më tepër vendet e Ballkanit apo Turqinë”, përfundoi ai. Që nga themelimi në 1952 nga anëtarët themelues si Francës, Holandës, Belgjikës, Italisë, Gjermania Perëndimore dhe Luksemburgu, BE ka pësuar zgjerime shtatë herë. Danimarka, Mbretëria e Bashkuar dhe Irlanda u bashkuan në vitin 1973; Greqia në vitin 1981; Portugalia dhe Spanja në vitin 1986; Finlanda, Suedia dhe Austria në vitin 1995; Qipro, shtetet baltike, Malta, Polonia, Sllovakia, Sllovenia, Republika Çeke dhe Hungaria në 2004; Bullgaria dhe Rumania në vitin 2007; dhe Kroacia në vitin 2013.

I papranueshëm sulmi ndaj vetingut

Genoveva Ruiz Calavera

BE-ja dhe SHBA-ja janë plotësisht të përkushtuara që të vazhdojë ta mbështesë reformën e gjyqësorit në Shqipëri, për të garantuar të drejtën e qytetarëve për një shoqëri demokratike ku askush nuk është mbi ligjin. Vetingu i gjyqësorit është një hap thelbësor në këtë drejtim.

Ka kaluar pak më shumë se një vit që kur Komisioni i Pavarur i Kualifikimit mbajti seancën e parë dëgjimore në kuadër të procesit të vetingut. Që atëherë, institucioni i vetingut i shkallës së parë ka miratuar më shumë se 140 vendime. Ato janë pasuar nga rreth 20 vendime të formës së prerë në nivelin e Dhomës së Apelit.

Rezultatet shumë të prekshme të arritura deri më sot na kanë lejuar të bëjmë analizën e këtij viti të parë të punës intensive dhe të trajtojmë sfidat që na presin përpara, duke marrë parasysh se vetingu do të vazhdojë për disa vjet për të përfunduar vlerësimin e mbi 800 gjyqtarëve dhe prokurorëve.

Së pari, populli shqiptar meriton vlerësim të veçantë. Falë vendosmërisë së tij të fortë gjyqësori në të gjithë vendin po pastrohet nga korrupsioni, njëherë e përgjithmonë. Dëshira e tij për një gjyqësor vërtet të paanshëm dhe profesional donte të thoshte se reformat mund të fillonin. Qytetarët duhet të vlerësohen gjithashtu për interesin e tyre të vazhdueshëm gjatë gjithë procesit. Që kur institucionet e vetingut filluan të jepnin rezultatet e para, publiku ka ndjekur nga afër çdo hap, rezultat dhe vendim. Ky interes publik ka gjeneruar gjithashtu një numër të madh denoncimesh për korrupsion dhe keqmenaxhim të drejtësisë nga qytetarët drejtpërdrejt te vëzhguesit që janë pjesë e Operacionit Ndërkombëtar të Monitorimit (ONM). Gjatë gjashtë muajve të fundit, ONM ka marrë përafërsisht 250 denoncime nga individë, ndërmarrje private, OJQ dhe institucione publike. Kjo gatishmëri për të kontribuar tregon se qytetarët besojnë se vetingu po shkon në drejtimin e duhur për t’iu përgjigjur aspiratave legjitime publike.

Së dyti, strukturat e gjyqësorit të krijuara rishtazi meritojnë inkurajim të veçantë. Nuk duhet të harrojmë se reforma e drejtësisë përfshinte një rishikim të të gjithë qeverisjes së gjyqësorit me rrënjë e me degë. Ajo u përqendrua në krijimin e një sistemi të pavarur dhe të vetëqeverisur që garanton integritet dhe përgjegjësi të qëndrueshme, si dhe pavarësi nga ndikimi politik. BE-ja i mbështet plotësisht këshillat e reja dhe të veçanta të gjyqësorit dhe prokurorisë që janë themeluar, si dhe Këshillin e ri për Emërimet në Drejtësi, duke pranuar se duhet kohë për të ndërtuar një sistem të ri të qëndrueshëm.

Së treti, tani që ka kaluar një vit, është e mundur të bëhet një analizë e parë e rasteve dhe rezultateve të vetingut. Vetingu është një proces kompleks dhe çdo dosje e veçantë, që përfshin me mijëra faqe, është e ndryshme nga tjetra. Ka nuanca dhe aspekte të të tria shtyllave të vlerësimit që mund të çojnë në konkluzione të ndryshme për shkaqe që duken të ngjashme. Vëzhguesit ndërkombëtarë të ONM-së i kanë monitoruar vendimet e institucioneve të vetingut në të gjitha nivelet, si dhe kanë ndjekur nga afër rezultatin e hetimeve të kryera nga organet ndihmëse. Një punë rigoroze nga Dhoma e Apelit është tani shumë e rëndësishme për të larguar çdo shqetësim në lidhje me administrimin e paanshëm të drejtësisë. Është gjithashtu e rëndësishme të theksohet se nëse një person i vlerësuar mendon se të drejtat e tij / saj janë dëmtuar gjatë procesit, Kushtetuta e Shqipërisë garanton që ai / ajo ka të drejtë t’i drejtohet Gjykatës Evropiane për të Drejtat e Njeriut (GjEDNj) në Strasburg. Një numër të vlerësuarish e kanë referuar tashmë rastin e tyre në Gjykatë dhe vendimet e ardhshme do të kontribuojnë gjithashtu në jurisprudencën e institucioneve të vetingut.

Së katërti, kur shqyrtohen rezultatet e vetingut të vitit të parë të operacioneve, është e qartë se procesi ka pasur një ndikim të fortë mbi institucionet ekzistuese. Është shumë pozitiv fakti që tashmë janë krijuar organet e reja brenda gjyqësorit për të ndërmarrë përgjegjësi me angazhimin dhe profesionalizmin më të madh. Mungesa e kuorumit në Gjykatën Kushtetuese ka qenë, sigurisht, një çmim shumë i lartë për t’u paguar për tranzicionin. Nuk duhet të habitemi që procesi i rivlerësimit ka pasur implikime dhe pasoja në gjyqësor në të gjitha nivelet. Megjithatë, procesi i zëvendësimit të gjyqtarëve është në vazhdim dhe ky tranzicion do të përfundojë së shpejti. Ne besojmë se Këshilli i ri i Emërimeve në Drejtësi që kryen vlerësimin e vazhdueshëm dhe renditjen e kandidatëve, si dhe të gjitha institucionet e tjera që janë përgjegjëse për të bërë emërimet përfundimtare, do të kërkojnë kandidatët me integritetin më të lartë nga ata që kanë aplikuar. Puna e tyre duhet të kryhet shpejt, por pa sakrifikuar cilësinë.

Duke pasur parasysh interesin e lartë publik, është e rëndësishme të sigurohet monitorimi nga afër i procesit dhe të kontribuohet në mënyrë konstruktive në progresin e tij. Megjithatë, kjo nuk justifikon sulmin ndaj procesit në kushte të padrejta dhe të papranueshme, duke përfshirë edhe rastet kur i drejtohet personalisht anëtarëve individualë të institucioneve të vetingut. Disa njerëz mund të kenë frikë nga reforma gjyqësore dhe të jenë të gatshëm ta pengojnë atë, por kjo nuk mund të lejohet. Është përgjegjësi e të gjitha institucioneve shqiptare, partive politike, si dhe e shoqërisë civile, që të sigurojnë se forcimi i pavarësisë, paanësisë dhe llogaridhënies së gjyqësorit përmes këtij procesi është i garantuar. Muajt ​​e ardhshëm do të jenë vendimtarë, teksa Shqipëria do të kalojë nga faza e tranzicionit të reformës gjyqësore në zbatimin e saj të plotë. Organet e vetingut do të sigurojnë trajtimin e vazhdueshëm të rasteve prioritare në mënyrë që institucionet e reja të mund të krijohen plotësisht.

BE-ja, së bashku me SHBA-në në ONM, do të vazhdojë ta mbështesë këtë proces në mënyrë që populli shqiptar të përfitojë nga reforma dhe të krenohet me ndryshimin që kërkoi dhe që e ka dëshiruar për një kohë kaq të gjatë.

*Drejtore për Ballkanin Perëndimor në Komisionin Europian dhe Shefe e Operacionit Ndërkombëtar të Monitorimit (ONM).

Kryediplomati grek: Respektoni minoritetin që të merrni negociatat

Kryediplomati grek, Jorgos Katrougalos, ka pritur në një takim përfaqësues të minoritetit grek në Shqipëri, ish deputetin e LSI Vangjel Tavo dhe kryetarin e Partisë Bashkimi për të Drejtat e Njeriut Vangjel Dule, ku ka deklaruar se Shqipëria duhet të respektojë minoritetin që të përfitojë negociatat. Sipas qeverisë greke pa u respektuar të drejtat e minoritetit në Shqipëri nuk ka çelje në negociatave. “Mospranimi nga ana e Komisionit Qendror të Zgjedhjeve i kandidaturës së Fredi Beljerit për kryetar të Bashkisë së Himarës sipas Athinës zyrtare, është i pabazuar në ligj”, deklaroi Katrogalos. Ministri i Jashtëm theksoi gjithashtu mbështetjen aktive të Greqisë për të mbrojtur të drejtat pronësore të grekëve në Shqipëri, sipas të drejtës evropiane dhe ndërkombëtare. Në këtë kontekst dhe pas publikimit të vendimeve të fundit të Qeverisë Shqiptare, Greqia pret diçka të shpejtë dhe efikase për të lejuar minoritarët të regjistrojnë pronat e tyre, pasi shumë prej tyre janë duke u përpjekur pa sukses për dekada të tëra.

Theksi i veçantë nga ana e kryediplomatit grek u vu në regjistrimin e popullsisë ne vitin 2020, i cili duhet të garantojë të drejtën për vetëdeklarim. Athina zyrtare mbështet të drejtën e vetëdeklarimit të lirë të anëtarëve të minoritetit grek në të gjithë territorit e Republikës së Shqipërisë.

Analiza e Washtington Post: Ballkani po tradhtohet nga BE

Washington Post i ka kushtuar një artikull të veçantë marrëdhënieve të BE-së me Ballkanin Perëndimor dhe cështjes së integrimit, duke konkluduar se BE duhet të hapë negociatat për Shqipërinë dhe Maqedoninë. Në një analizë të gjatë Washington Post thotë se BE ka 16 vite që i premton Ballkanit, por asgjë nuk është bërë deri më sot. “Përgjatë 16 viteve të fundit, Brukseli i ka premtuar vendeve të Ballkanit Perëndimor, që janë edhe rajoni më vulnerabël i Kontinentit të vjetër, se e ardhmja e tyre është në Bashkimin Euorpian, por gjatë vitit të fundit, Brukseli ka kryer një rrokullisje të madhe, duke vënë dyshim idenë e zgjerimit”, thuhet në shkrimin me titullin “Si Bashkimi Evropian po e tradhton Ballkanin Perëndimor”. Sipas shkrimit të Jasmin Mujanovic, politiolog i specializuar në  politikën e Europës Juglindore, tema e zgjerimit është zhdukur nga axhenda e liderëve të BE, ndërsa kujton edhe rrezikun rus, kinez dhe turk në Ballkan.

“Ndërsa shtetet anëtare hyjnë në zgjedhjet e Parlamentit Europian, Komisioni Europian pa asnjë pengesë e ka hedhur idenë e vitit 2025 si data e ardhshme më e hershme për një raund të ri zgjerimi. Por në Paris, Emmanuel Macron është i qartë: Nuk do të ketë zgjerim, të paktën jo në të ardhmen e parashikueshme. Edhe në Berlin, zgjerimi është bërë politikisht një temë toksike”, vazhdon analiza.

Por Washington Post thotë se BE ende mund të ndryshojë kursin dhe këtë mund ta bëjë duke hapur negociatat me Shqipërinë dhe Maqedoninë e Veriut. “Ajo duhet të fillojë formalisht negociatat e anëtarësimit me Maqedoninë e Veriut dhe Shqipërinë dhe të paktën të lejojë statusin e kandidatit të Bosnjes. Kjo do të stabilizojë njëkohësisht anijen.

Detyra e madhe, megjithatë, është krijimi i një plani afatgjatë të qëndrueshëm për rajonin, i cili do të sjellë jo vetëm një angazhim të besueshëm ndaj normave dhe praktikave liberale-demokratike, por edhe një pengesë të fuqishme ndaj pëlqyrave të Rusisë”, thuhet në shkrim.

E për këtë, Washington Post analizon që nëse BE rrëshqet nga komuniteti euro-atlantik, liderët europianë do të fajësojnë vetëm veten e tyre. Nëse BE nuk zgjerohet, politika e Ballkanit shumë shpejt do të bëhet e dëshpëruar dhe e rrezikshme, sidomos për vetë Bashkimin Europian.

Franca i pret shpresat Shqipërisë, “JO” në BE

Partia aleate e Macron, “La République En Marche” e Nathalie Loiseau gjatë një interviste siguron se do të votojë kundër hapjes së negociatave për hyrjen në BE të Shqipërisë dhe Maqedonisë së Veriut.

“Unë isha ajo që bllokoi zgjerimin e Bashkimit Europian në Shqipëri dhe Maqedoninë e Veriut.” tha Loiseau, e cila shtoi pyetjen e saj “A duhet të hyjë Shqipëria dhe Maqedonia e Veriut në Bashkimin Evropian?” Loiseau shtoi se dhe kreu i partisë “Les Républicains”, François-Xavier Bellamy është gjithashtu kundër.

“Ai që ka qenë për zgjerim, për vite me radhë është Laurent Wauquiez. Ai ka ndryshuar mendim dhe beson se njerëzit nuk kanë kujtesë”. Loiseau shton gjithashtu: “Unë shkova në Maqedoninë e Veriut për të thënë jo, sepse nuk jeni gati, sepse ne nuk jemi gati. Nuk do të ketë negocime në qershor. Ne do të jemi kundër, do të vazhdojmë të jemi kundër. Ata janë gjeografikisht në Europë, ne duhet t’i ndihmojmë ata, por jemi kundër zgjerimit të BE.”

Komisioneri i BE-së: Asnjë kërkesë nga Holanda për vizat

Holanda nuk ka bërë asnjë kërkesë në Bashkimin Europian për vendosjen e vizave për shtetasit shqiptarë. Këtë e ka konfirmuar sot Komisioneri i BE-së për Migrim dhe Çështjet e Brendshme Dimitris Avramopoulos, i cili ishte i pranishëm në aktivitetin e FRONTEX në Tiranë.

“Ne nuk bëjmë komente për atë që vendoset në nivelin e vendeve anëtare, por për derisa thelbi kryesor ka të bëjë me mekanizimin për pezullimin e vizave, që ka interes të madh për ju, më lejoni t’u them se Komisioni nuk ka marrë asnjë njoftim që kërkon pezullimin e vizave. Për asnjë vend në Europë që përfiton. Nëse mund të ndodhë në të ardhmen, më besoni se do të bëjmë një analizë të kujdesshme nëse një veprim i tillë do të duhet të merret apo jo në përputhje me procedurat dhe informacionin që ka të bëjë me rrethanat specifike” tha ai.

Komisioneri i BE-së tha se qeveria shqiptare ka bërë një punë të mirë në ndalimin e fluksit të azilantëve në drejtim të vendeve të BE-së, ndërsa theksoi se BE duhet të njohë reformat që ka ndërmarrë vendi.

“Kjo marrëveshje e afron Shqipërinë me BE-në. Nga ana e BE-së ne e kemi dhënë këtë rekomandim në 2018 për çeljen e negociatave dhe i qëndrojmë atij. Siç e dini në fund të fundit është këshilli ai që e merr vendimin për çeljen e negociatave. Që prej qershorit të shkuar Shqipëria ka bërë progres në lidhje me reformën në drejtësi, luftën ndaj krimit të organizuar dhe kanabisit dhe kjo duhet pranuar, duhet njohur. Por ky progres duhet të jetë i qëndrueshëm. Punë duhet për të ndalur numrin e aplikimeve të pabaza për azil, dhe unë shoh angazhimin e autoriteteve shqiptare për ta arritur këtë”,- tha ai.

Lidhur me këtë cështje kryeministri Rama është shprehur se numri i shqiptarëve të paligjshëm në vendet e BE-së ka rënë me 27% sipas raportit të fundit të institucioneve të Brukselit, po ashtu edhe azilkërkuesit me 32%. “Emigracioni i paligjshëm i shqiptarëve vijon që të bjerë në mënyrë të ndjeshme dhe bazuar në raportin e 2018 të KE-së, në 2018 e kanë kaluar kufirin në mënyrë të paligjshme për në BE 27% më pak shqiptarë se një vit më parë, ndërsa kërkesat për azil janë ulur me 32% në gjysmën e parë të 2018 krahasuar me 2017. Falë bashkëpunimit të disa vendeve partnere që u përballën me këtë problem faktikisht emigrimi është minimizuar në shifra të papërfillshme”,- tha Rama.

Greqia mbështet anëtarësimin në BE, nëse Rama plotëson këtë kusht

“Greqia do të mbështesë anëtarësimin e Shqipërisë, nëse respektohen të drejtat e minoritetit grek” ka deklaruar kryeministri grek Alexis Tsipras gjatë një interviste për “Financial Times”. Tsipras ka thënë se mbrojtja e të drejtave të minoritetit grek është një ndër kushtet kryesore për rrugën e Shqipërisë drejt anëtarësimit në Bashkimin Europian, madje këtë ia ka shpjeguar edhe kryeministrit Rama.

“Marrëdhëniet greko-shqiptare kanë qenë të vështira duke përfshirë kufijtë detar, ligjin teknik të luftës që ka ekzistuar mes dy vendeve që nga viti 1945 dhe statusin e minoritetit etnik grek, aktualisht të ngecura pas një dialogu premtues të nisur në nëntor të 2017-s. Nëse Shqipëria përmbush detyrimet e saj për të drejtat e njeriut, Greqia dhe unë personalisht do të mbështesim një vendim të mundshëm në qershor për Shqipërinë dhe Maqedoninë e Veriut, që të nisin procesin e anëtarësimit në BE së bashku. Por ne nuk do të vëmë në rrezik procesin e anëtarësimit për Maqedoninë e Veriut, nëse ka bërë progres. Do të ishte e padrejtë”. – ka thënë Tsipras

Tsipras thekson se Greqia nuk dëshiron të vendosi kushte tepër të ngurta për vendet që aspirojnë të anëtarësohen në BE, por theksoi se popujt e Ballkanit kanë nevojë për një nxitje të reformave.

Pas 21 majit, kufijtë e Shqipërisë do kontrollohen nga BE

Kufijtë e Shqipërisë do të monitorohen dhe kontrollohen nga agjencia e Bashkimit Europian “Frontex”, që pas 21 majit.

Ceremonia zyrtare do të mbahet ditën e martë në praninë e komisionerit Dimitris Avramopoulos, drejtorit ekzekutiv të Frontex Fabrice Leggeri, kryeministrit Rama dhe ministrit të Brendshëm, Sandër Lleshaj.

Kjo marrëveshje e futi vendin tonë në histori, pasi Frontex për herë të parë do të ruaj territoret e një vendi që nuk është anëtare e BE-së.

Skip to toolbar