Trazira në Ballkan, nëse BE nuk çel dyert për Shqipërinë

Gazeta prestigjioze Financial Times parashikon se Ballkani do të përfshihet nga protestat dhe trazirat, në rast se Bashkimi Europian nuk do të ndezë dritën jeshile për hapjen e negociatave me Shqipërinë dhe Maqedoninë e Veriut.

Artikulli më shumë, vë theksin te pritshmëria që kanë këty dy vende, veçanërisht Maqedonia e Veriut, e cila dha një shembull pozitiv në të gjithë Rajonin duke miratuar një marrëveshje historike me Greqinë, dhe natyrisht që pret një shpërblim nga BE. Por, ndërkohë, shkruan Financial Times, nëse Maqedonia e Veriut pranohet dhe Shqipëria lihet në pritje, atëherë kjo do të nxisë lëvizjet nacionaliste për Shqipërinë e Madhe.

“Një lëvizje e tillë do të ishte njësoj sikur t’i hidhje benzinë zjarrit të ndjenjave nacionaliste mbarë shqiptare. Politikanët dhe aktivistët në Shqipëri e Kosovë do të braktisnin shpresat e anëtarësimit në BE dhe do të përqafonin kauzën e Shqipërisë së Madhe në mënyrë më të hapur. Kjo do të ndikonte në përpjekjet për zgjidhjen e mosmarrëveshjeve mes Serbisë dhe Kosovës por edhe në zbutjen e tensioneve mes boshnjakëve, serbëve dhe kroatëve në Bosnie Herzegovinë,” shkruhet në Financial Times.

Ballkani, sipas gazetës, është një terren pjellor për ndërhyrjet e ndërkombëtarëve, duke qenë se kohët e fundit ka tërhequr vëmendjen e Rusisë, Turqisë dhe Kinës.

Gazeta paralajmëron Bashkimin Evropian që të tregojë kujdes me vendimet që do të marrë në Samitin e Qershorit, ndonëse kritikët e zgjerimit ankohen për cilësinë e dobët të demokracisë dhe rendin ligjor në Ballkan.

Pavarësisht këtyre kritikave, Financial Times argumenton se ligjvënësit evropianë duhet të marrin parasysh edhe entuziazmin e qytetarëve ballkanas për zgjerimin.

“Besimi i të gjithë rajonit tek Bashkimi Evropian dhe entuziazmi i popujve për reformat e vështira do të zbehet nëse Bashkimi Evropian nuk jep një sinjal pozitiv. Çdo gjë tjetër do të nxiste trazira në Ballkan dhe do të dëmtonte Bashkimin Evropian. Në fund, blloku do t’i bëjë dëm vetes,” shkruhet në gazetë.

Soreca: Veprimet ndaj Borchardt nuk lidhen me demokracinë

Ambasadori i Bashkimit Europian në Shqipëri, Luigi Soreca ka reaguar në lidhje frikësimin që i është bërë ambasadorit të OSBE-së në Tiranë, Bernd Borchardt. Në një postim në Twitter, Soreca shkruan se në një demokraci moderne nuk ka vend për veprime të tilla.

“E dënojmë me gjithë zemër frikësimin që i është bërë ambasadorit të OSBE në Tiranë, Bernd Borchardt. Dënojmë grafitet dhe të gjitha mënyrat e tjera që janë përdorur kundër tij, kundër autoritetit të tij zyrtar. Nuk ka vend për veprime të tilla në një demokraci moderne”- shkruan Soreca.

We condemn wholeheartedly the intimidation of @OSCEinAlbania Ambassador #BernBorchardt and the damage caused to his official residence. There is no place for such action in a modern democracy. https://t.co/9ILEHYByhj
— Luigi Soreca🇪🇺 (@LSorecaEU) May 13, 2019

Veliaj çel “Fshatin e BE” dhe ka një porosi për të rinjtë

Në Tiranë po zhvillohet Java Europiane dhe sot kryebashkiaku Erion Veliaj ka celur “Fshatin e BE-së”, ku është shoqëruar nga ambasadori i BE-së në Tiranë, Luigi Soreca. Veliaj është shprehur optimist që këtë verë BE do të hapë negociatat me Shqipërinë, ndërsa shprehur ambicien e tij që Tirana të përzgjidhet si Kryeqyteti Europian i të Rinjve në vitin 2022.

“Fokusi te rinia është fabula më e bukur për Tiranën. Me shumë shpresë, negociatat do të hapen këtë vit, por ama ne duam që në 2022 të kemi një shans që, si kryeqyteti europian i rinisë, të tregojmë më të mirën e vendit tonë. Do të punojmë të gjithë bashkë që Tirana të fitojë “Kryeqytetin evropian të rinisë” në 2022”, tha Veliaj.

Ai u bëri thirrje të rinjve që teksa vendi shkon drejt zgjedhjeve lokale, të bëhen një zë aktiv për të parashtruar kërkesat e tyre ndaj kandidatëve dhe për të kërkuar më pas llogari për plotësimin e tyre. “Mezi pres që teksa futemi në fushatën lokale në të 61 bashkitë, të ketë një zë aktiv të rinisë, për t’i bërë që tani kërkesat që çdo qytet apo çdo bashki duhet të përmbushë në mandatin e ardhshëm. Do të doja që çdo organizatë rinore në bashkinë e tyre, t’i bëjë që tani listat e kërkesave dhe të kërkojë llogari jo vetëm gjatë fushatës, por menjëherë ditën e parë të punës te kryebashkiaku i vet për plotësimin e atyre kërkesave”, tha ai.

Veliaj nënvizoi se Bashkimi Evropian është më së shumti një projekt i njerëzve që punojnë çdo ditë dhe përmbushin detyra konkrete, duke shërbyer edhe si shembull frymëzimi. Shumë prej diplomatëve të huaj në vendin tonë kanë zgjedhur që të japin edhe një kontribut të drejtpërdrejtë duke iu bashkuar nismave të ndërmarra në këto katër vite nga Bashkia e Tiranës. Teksa i falenderoi për bashkëpunimin, Veliaj theksoi se vetëm falë punës mund të ecet përpara.

“Me shumë prej ambasadorëve kemi mbjellë pemë, duke ndërtuar kënde lodrash, ose një kopsht, një çerdhe a një pistë biçikletash, një festival filmi ose një koncert. Jam i sigurt që edhe ata shohin gjëra që nuk u pëlqejnë, por në vend që të jenë vetëm kritikë, thonë çfarë mund të bëj që të jap një dorë? Unë e di ekzaktësisht çfarë nuk funksionon në Tiranë, sa puseta janë vjedhur, sa pllaka janë hequr, sa gropa janë hapur, por pyetja është: zgjidhim më shumë punë duke bërë diçka apo duke qarë?”, nënvizoi Veliaj, teksa vlerësoi se Bashkimi Evropian vijon të jetë institucioni më i besuar në Shqipëri.

“Kur dikush vjen në Tiranë ose për vizitë në bashki dhe thotë: çfarë mendoni për krizën që po kalon Bashkimi Europian? Përgjigjja jonë është: cila krizë? Bashkimi Europian është institucioni më i besuar në Shqipëri. Për këto arsye unë besoj se gjërat në të cilat besojmë janë gjëra që duhet t’i kurojmë përditë”, u shpreh Veliaj.

Nga ana e tij, Ambasadori i BE-së në Tiranë, Luigi Soreca theksoi se përfshirja e të rinjve në procesin e integrimit të Shqipërisë në BE është vendimtare.

“Fshati i BE-së” është pjesë e aktiviteteve të “Javës së Europës” dhe organizohet nga Delegacioni i Bashkimit Europian në Shqipëri në bashkëpunim me ambasadat e shteteve anëtare të Bashkimit Europian në Tiranë dhe Bashkia Tiranë. Të rinjtë do të kenë mundësi të mësojnë më shumë rreth temave që prekin të rinjtë në Shqipëri, studimin në vendet e BE-së, po ku nuk do të mungojë as aktivitetet e shumta të fokusuara tek aktivizimi i rinisë, bizneset sociale, vullnetarzimi, arsimimi dhe shkëmbimet ndërkulturore të të rinjve.

Presidenti polak: BE të hapë dyert për Shqipërinë

Presidenti i Polonisë, Andrzej Duda, i pranishëm në samitin e Brdo- Brijunit në Tiranë i bëri thirrje shteteve të BE që të mbajë të hapura dyert e anëtarësimit dhe të pranojë Shqipërinë në gjirin e saj.

“Me një mbështetje të mençur me këto vende që do të bëhen pjesë e BE-së në të ardhmen, duhet t’i mbajë dyert e hapura për anëtarësim. Mendimi im përsa i përket politikës së BE-së do të duhet të jetë e dyerve të hapura. Ne jemi pjesë e saj prej 15 vitesh, jemi të lumtur, mbështetja e polakëve është mjaft e madhe dhe gëzojnë lirinë që solli”, tha Duda.

Nga ana tjetër, ai bëri thirrje që për zgjidhjen e problemeve mes vendeve fqinje duhet që të lihet pas historia dhe të diskutohet me qetësi.

“Diskutimet që po zhvillohen mes liderëve në një atmosferë më të qetë, janë të rëndësishme për procesin e stabilitetit pasi çojnë drejt zgjidhjeve të problemeve të rajonit, që më pas do të bëjnë zhdukjen e dallimeve që janë të dukshme. Në vendin tim dhe në vendet fqinje kanë ndodhur këto dukuri gjatë dhe pas luftës. Kjo është pjesë e historisë sot dhe çështjet mund të diskutohen më me qetësi, të qartësohen çështjet në rrugën drejt BE-së, të zgjidhen nëpërmjet dialogut mes liderëve, dialogut mes kombeve, në procesin e ndërtimit të prosperitetit dhe rritjes së standardeve të jetesës. Është detyrë e shteteve të BE-së që ta kuptojnë dhe ta mbështesin këtë proces”, u shpreh Andrzej Duda në konferencën për mediat gjatë Samitit Brdo Brijunit.

Soreca: Është koha që partitë të gjejnë kompromisin

Në një intervistë për Deutsche Wellen, Ambasadori i BE në Shqipëri, Luigi Soreca flet për fokusin e Javës Evropiane, procesin e reformës në drejtësi, krizën politike si edhe perspektivën e hapjes së negociatave të anëtarësimit BE-Shqipëri.

DW: Z. Ambasador, nisët Javën e Evropës 2019 dhe slogani i saj është “Fuqia e Rinisë”. Pse kjo zgjedhje sivjet?

Ambasadori i BE Luigi Soreca: Mendoj se nuk kishte zgjedhje tjetër të mundshme, në një vend ku 40% e popullsisë është më e re se 30 vjeç. Të rinjtë janë të pranishëm, të rinjtë janë e ardhmja e vendit dhe ata janë gjithashtu qytetarë të ardhshëm të Bashkimit Evropian. Dhe ata po bëjnë thirrje që të kontribuojnë në hartimin e politikave, por gjithashtu për të pasur nevojat themelore, prandaj mendoj se është detyra jonë, para së gjithash e autoriteteve shqiptare, por gjithashtu edhe e BE-së që të mos e lejojmë këtë thirrje të bëhet një thirrje e humbur.

DW: Gjithsesi ka një numër në rritje të të rinjve që duan të largohen nga Shqipëria për disa arsye. Cilat janë mënyrat më të mira për të ndërhyrë dhe për ta parandaluar këtë dukuri?

Ambasadori i BE Luigi Soreca: Ka masa që duhet të ndërmerren në periudhën afatgjatë, afatmesme dhe afatshkurtër. Natyrisht që nuk do t’i rendis të gjitha, por punësimi dhe arsimi është për të rinjtë nevoja më e rëndësishme në programin afatgjatë, por ata kanë nevojë për këtë tani, për këtë arsye ne duhet të vemë në dispozicion të tyre infrastrukturën dhe fondet e nevojshme. Ne mund të ndihmojmë, por kjo është kryesisht një nevojë shqiptare. Pika tjetër është, dhe dua që me të vërtetë ta theksoj, të rinjtë kërkojnë të dëgjohen, duan të marrin pjesë, duan të përfshihen. Dhe kjo është e vetmja mënyrë që ata të jenë pjesë e sistemit shqiptar dhe për këtë arsye të mos largohen, sepse vetëm nëse kanë një punë, por edhe nëse dëgjohen nga institucionet publike ata ndjehen pjesë e asaj ku ata tashmë janë pjesë. Për ndonjë arsye nuk ka hapësirë për dialog mes tyre dhe sistemit shqiptar dhe Java e Evropës ka për objektiv krijimin e këtij dialogu. Tani është një dialog për shkëmbimin e ideve, por një nga rezultatet që ne dëshirojmë të kemi nga Java është krijimi i një dialogu të strukturuar dhe lejimi i të rinjve dhe fëmijëve që janë kaq të angazhuar, kaq të zgjuar, të marrin pjesë në hartimin e politikave, të shprehin idetë e tyre dhe pastaj të jenë pjesë e përhershme e Shqipërisë plotësisht dhe kjo me siguri do t’i ndihmojë ata të qëndrojnë aty ku e kanë vendin.

DW: Ju paraqitët një sondazh mbi perceptimin e qytetarëve shqiptarë lidhur me Bashkimin Evropian në Shqipëri. Cilat janë gjetjet që janë më të rëndësishme në pikëpamjen tuaj?

Ambasadori i BE Luigi Soreca: Ne jemi shumë të kënaqur të shohim se populli shqiptar ende është shumë pranë Bashkimit Evropian. Pothuajse 93% e qytetarëve shqiptarë, siç tregohet në sondazh, beson se anëtarësimi në BE është objektivi i tyre më i rëndësishëm. 79% e tyre gjithashtu besojnë se reforma e drejtësisë është gjëja e duhur për të bërë. Dhe vetëm 13% e qytetarëve shqiptarë besojnë se reforma e drejtësisë nuk po shkon në drejtimin e duhur. Dhe mendoj se kjo është një çështje e rëndësishme, reforma e drejtësisë ka qenë një nga reformat më të rëndësishme të ndërmarra nga Shqipëria. Duhet kohë, është një reformë gjigante, po ecën në mënyrë të qëndrueshme.

DW: Por ka një vakuum të madh në sistemin gjyqësor. Për shembull, një Gjykatë Kushtetuese që nuk funksionon. Si mund të mbështesë Bashkimi Europian për të normalizuar situatën?

Ambasadori i BE Luigi Soreca: Po diskutoja me Kryetarin e Këshillit të Emërimeve në Drejtësi javën e kaluar dhe ai më tha se e ka finalizuar listën e kandidatëve për t’ia dorëzuar Presidentit dhe pastaj Parlamentit për anëtarët e Gjykatës Kushtetuese. Shpresojmë se në muajt e ardhshëm Gjykata Kushtetuese do të rifillojë. Jam plotësisht i vetëdijshëm për ndikimin që kjo periudhë ka pasur në jetën e përditshme të qytetarëve shqiptarë dhe ata kanë të drejtë, por në fakt 79% e tyre ende mbështesin reformën e drejtësisë dhe na tregojnë se sa e rëndësishme është ajo për qytetarët shqiptarë. Elementi përfundimtar që dua të shoh nga sondazhi është fakti se qytetarët shqiptarë duan që ne të kujdesemi më shumë për faktorët ekonomikë dhe socialë. Këto janë elemente që nuk janë medoemos në agjendën e diskutimit politik, por këto janë nevojat e përditshme të shqiptarëve dhe ata po i bëjnë thirrje politikës dhe rrjedhimisht edhe bashkësisë ndërkombëtare që të kujdesen edhe më shumë për anën ekonomike të jetës. Dhe ne jemi shumë të kënaqur që programi ynë, që do ta zbatojmë dhe që po e zbatojmë tashmë, përqendrohet aq shumë tek përfshirja sociale dhe zhvillimi ekonomik.

DW: Por z. Ambasador, ka një perceptim se reforma gjyqësore po ecën shumë ngadalë dhe askush nuk po shkon në burg. Kur do t’i ndjejnë qytetarët shqiptarë efektet e kësaj reforme?

Ambasadori i BE Luigi Soreca: Dy Këshillat janë ngritur, 130 prokurorë dhe gjyqtarë kanë kaluar përmes procesit të vetingut, – 25 kandidatë të SPAK-ut do të zgjidhen tani, pritet që anëtarët e Gjykatës Kushtetuese të zgjidhen së shpejti, 53 gjyqtarë të rinj janë zgjedhur javën e kaluar nga Shkolla e Magjistraturës. Pra, reforma e drejtësisë është duke ecur përpara, është e pakthyeshme. Së shpejti do të kalojmë kthesën ku reforma e drejtësisë do të bëhet një fakt i përditshëm për qytetarët shqiptarë. Kjo është shpresa jonë dhe mendoj besimi ynë.

DW: Pavarësisht disa reformave të ndërmarra, procesi i hapjes së negociatave me BE-në ka një shtyrje për në muajin shtator. A ka ndikuar kriza politike në këtë shtyrje?

Ambasadori i BE Luigi Soreca: Shqipëria duhet të besojë në atë që bëri gjatë vitit të kaluar. Komisioni Evropian do të nxjerrë një raport në fund të këtij muaji dhe më pas Këshilli – ju e dini dallimin mes Komisionit dhe Këshillit – do të marrë një vendim jo vetëm për përmbajtjen, por edhe për afatin kohor. Dhe kjo varet tërësisht nga Presidenca Rumune e Këshillit. Kam dëgjuar ashtu si dhe ju, se ka disa shtete anëtare që mund të kenë nevojë për më shumë kohë për të vlerësuar raport-progresin e Komisionit Evropian duke pasur parasysh se ka vetëm tri javë kohë ndërmjet miratimit të raportit dhe vendimit të Këshillit. Por kjo ende nuk është vendosur, ndaj derisa të vendoset i ftoj autoritetet shqiptare që të vazhdojnë të përqendrohen në këtë afat. Nëse ky afat do të shtyhet për më vonë këtë vit, shpresoj vërtet që qeveria shqiptare ta përdorë mirë këtë kohë. Dhe në muajt e ardhshëm SPAK-u do të funksionojë, Gjykata Kushtetuese do të rikthehet dhe ndoshta do të kemi edhe një zbatim të plotë të rekomandimeve të OSBE/ ODIHR mbi ligjin zgjedhor.

DW: Z.Ambasador, cili është mesazhi juaj për qytetarët shqiptarë dhe partitë politike shqiptare, në këtë situatë që po kalon Shqipëria?

Ambasadori i BE Luigi Soreca: Sigurisht që kemi luajtur një rol në këtë vend dhe ne vazhdojmë të luajmë një rol të rëndësishëm. Siç thashë më parë, ne kemi një mandat të fortë nga qytetarët shqiptarë, 93% prej të cilëve duan të hyjnë në Bashkimin Evropian, por gjithashtu edhe një përgjegjësi të fortë. Dhe tani është koha për ne që të japim rezultate, por është gjithashtu koha që partitë politike të këtij vendi të gjejnë një kompromis. Kultura e kompromisit nuk është medoemos tipike për këtë vend; ajo duhet të bëhet një moment ku takohen interesat. Gjithkush duhet të bëjë një hap përpara. Ka një urë diku dhe unë jam i sigurt, se ekziston një mënyrë për ta kaluar këtë urë dhe për të siguruar që të gjendet dialogu. Kjo është në interes të shtetasve shqiptarë që duan që ky vend të ecë përpara.

Rama: Mos ngatërroni negociatat me çështjet politike në vend

Gjatë prezantimi të platformës “Ambasada Ime” ishte i pranishëm edhe Kryeministri Edi Rama, i cili u bëri një thirrje të gjithë ambasadorëve që të punojnë për mundësimin e hapjes së negociatave për Shqipërinë dhe të mos përfshihen në çështjet politike që po ndodhin në vend. Rama tha se këtë lojë politike nuk kanë pse e vuajnë shqiptarët dhe se KE rekomandoi vitin e kaluar të hapeshin negociatat pa kushte për Shqipërinë.

“Të gjithë ambasadorëve dua t’iu them bëni atë që mundeni që të mos lejoni që loja me negociatat e brendshme të kthehet në lojë me zjarrin këtu në vendin tonë. Këtë shqiptarët nuk e meritojnë. Sigurisht kjo është përgjegjësi e përfaqësuesve politikë të shqiptarëve. Ka diçka të rëndësishme që vendet tuaja e kanë në dorë: Ta nxjerrin çështjen e integrimit dhe negociatave nga loja politike, duke i hapur negociatat dhe duke e bërë të pamundur që për arsye politike një palë apo një palë tjetër të marrin peng publikun dhe të shfrytëzojnë vështirësitë për çeljen e negociatave si benzinë për të hedhur në zjarrin e përplasjes politike. KE tha vitin e kaluar se në këtë qershor do të çelen negociatat dhe në dhjetor do të bëhet konferenca e parë, duke vendosur dhe disa detyra të tjera, që janë normale. Ajo që ka shumë rëndësi për ne është se u hap dera që Shqipëria të fillojë procesin. Kushedi çfarë do ndodhë në qershor! E them këtë sepse duhet të presim ditën. Ne do vazhdojmë t’i bëjmë detyrat tona, jo se i kërkon komisioni, por se në fund të gjithë duhet të jenë të kënaqur, por edhe sepse e kërkon e ardhmja e vendit tonë. Integrimi është një proces që na jep një fuqi njohjeje, dijeje, shtet-bërje, që nuk na buron nga tradita, sepse tradita nuk është aty për të na mësuar se si bëhet një shtet funksional demokratik dhe për këtë arsye na vjen nga e vetmja rrugë, që është BE. Askush nuk e di këtu se çfarë do të vendoset në qershor, por jam i bindur se ky është viti ku të gjitha rrethanat janë dhe do të jenë aty për të çelur negociatat.” – tha Rama

Kryeministri Rama tha gjithashtu se “komisioni ka rekomanduar hapjen e negociatave për Shqipërinë pa kushte, që do të thotë se Shqipëria i ka plotësuar të gjitha detyrat e shtëpisë. Kontestimi nuk lidhet më me kriteret objektive.”

Mogherini të mërkurën në Tiranë, por jo për krizën

Shefja e lartë e Politikës së Jashtme të BE-së, Federica Mogherini do të vizitojë Tiranën në datat 8 dhe 9 maj ku do të marrë pjesë në samitin “Brdo-Brijun”, ku do të jenë të pranishëm presidentët e Rajonit.

Pavarësisht se vizita e saj përkon me kulmin e një krize politike në vend, duket se Mogherini nuk e ka aspak në plan të negociojë me palët. Të paktën kështu ka thënë sot për mediat ambasadori i BE-së, Luigi Soreca.

“Përfaqësueja e lartë e BE, Federica Mogherini do të jetë në Tiranë për arsye rajonale ku do jenë të pranishëm presidentët e Rajonit. Ajo do të ketë takime dypalëshe më autoritetet më të larta të Shqipërisë. Misioni ka qenë i parashikuar dhe ndërmjetësimi nuk është në axhendë për momentin”, deklaroi Soreca.

Ambasadori i BE, Luigi Soreca tha se krizën duhet ta zgjidhin vetë shqiptarët dhe se ekziston një urë për dialog.

“Pra, janë partitë politike, qeveria, opozita që duhet të gjejnë atë urën që ekziston, në mënyrë që të tejkalojnë këtë ngërç, në të cilin gjendemi dhe që nga kjo të përfitojnë qytetarët e Shqipërisë, pra përfaqësimi i plotë i tyre në zgjedhje”, tha ambasadori i BE.

Ministri Cakaj është optimist: Në qershor presim hapjen e negociatave

Megjithëse Samiti i Berlinit na la të kuptojmë se negociatat me BE-në do të shtyhen për në shtator, ministri i jashtëm në detyrë, Gent Cakaj vazhdon të jetë optimist. Ai është shprehur sot se pret që në muajin qershor BE të çelë negociatat me Shqipërinë. Cakaj ishte i pranishëm sot në hapjen e aktiviteteve për javën Europiane. Ai tha se 90 % e shqiptarëve mbështesin integrimin në BE.

“Këtë muaj presim marrjen e rekomandimit për hapjen e negociatave. Raporti i Komisionit presim që të jetë dëshmi e shndërrimit pozitiv që veni ynë ka bërë në rrugën e pakthyeshme të integrimit Europian. Procesi i integrimit të vendit në BE është edhe më gjerë se kaq

Hapja e negociatave për anëtarësimin, që pritet të bëhet në qershor do jetë një mundësi shtesë që ta bëjmë vendin institucionalisht më funksional”, tha ministri i Jashtëm në detyrë.

Pack: Për Bashën dhe Ramën kam të njëjtat kritika

Eurodeputetja Doris Pack gjatë një eventi të organizuar në Shkodër ka folur për krizën politike në vend, procesin e vettingut dhe shpresat që BE ka në ecjen përpara të Shqipërisë. Pack tha se drejtësia duhet të gjej rrugën të bëhet e pavarur dhe të korruptuarit të dalin para gjykatës.

“Problemi është se drejtësia është në dorë të politikës, në momentin që kjo ndryshon atëherë do ketë një sistem drejtësie që funksionon. Keni vettingun që shpresojmë të ndryshojë situatën. Të korruptuarit duhet të dalin në gjykatë por gjykatë s’ka dhe këtë nuk e kuptoj. Ju duhet ta zgjidhni këtë çështje.” – tha Pack

Gjithashtu Pack cilësoi se si për Ramën, si për Bashën, ka të njëjtat kritika që të punojnë në rritjen e mirëqenies së qytetarëve.

“Me z.Rama kam patur diferencat e mia dhe ajo që mua më intereson është mirëqenia e qytetarëve. Nuk më interesojnë partitë dhe politika. Kush punon për mirëqenien ajo është politika më e mirë. Edhe Basha po të jetë do t’i them të njëjtat gjëra.”

BE dhe BERZH i japin Shqipërisë 100 milionë euro për turizmin

Kryeministri Edi Rama ka prezantuar sot në kryeministri projektin më të fundit në bashkëpunim me BE dhe BERZH të cilët do të japin një kontribut prej 100 milionë eurosh për zhvillimin e turizmit në Shqipëri. Rama tha se ky investim është shprehje e besimit të institucioneve ndërkombëtare te qeveria shqiptare.

“Shprehje të besimit e vlerësimit tek strategjia e përzgjedhur prej qeverisë shqiptare përmes rilindjes urbane”, tha Rama. “Projekti që lançojmë sot si një projekt i përbashkët mes BE-së dhe BERZH përbën jo vetëm shifër 100 mln euro por mbi të gjitha në përmbajtjen e vet një arsye më shumë për të vlerësuar rolin dhe kontributin e jashtëzakonshëm në vendin tonë të këtyre dy forcave. Kjo marrëveshje e re e cila do t’i shkojë si një mbështetje më shumë programit tonë transformues të turizmit në Shqipëri është edhe një shprehje kuptimplotë e vlerësimit dhe besimit të këtyre institucioneve tek rruga dhe strategjia e përzgjedhur prej nesh përmes rrugës së rilindjes urbane dhe asaj urbane”, theksoi kryeministri i cili bëri të ditur se Shqipëria do të vazhdojë të rrisë numrin e turistëve të huaj edhe gjatë këtij sezoni turistik.