Kryeprokuroria aktuale Arta Marku ka theksuar para Këshillit të Lartë të prokurorisë se nuk ka asnjë ndikim politik në punën e saj, është e pavarur nga politika dhe se ka mbështetjen e faktorit ndërkombëtar. Marku, e cila kandidon për postin e Prokurores së Përgjithshme përballë dy kandidatëve të tjerë të çertifikuar nga KLP, Fatjona Memçaj dhe Olsian Çela, tha se gjatë punës së saj në dy vite në postin e kryeprokurores së Përgjithshme të Përkohshme ka qenë nën presion politik dhe mediatik.
“Gjatë këtyre dy viteve të punës time kam punuar nën presion të madh politik, mediatik. Kam pasur mungesë kompetencash. Unë kam dëshmuar se nuk kam varësi nga politika. Jam anatemuar. E kam treguar sa herë kam pasur një rast të ndjeshëm për opinionin politik”, është shprehur Marku e cila për të treguar se nuk ka asnjë varësi nga politika solli si shembull firmosjen e fletë arrestit për kryebashkiakut të Vorës, Agim Kajmaku. “Më duhet t’ju përmend këtu rastin e fundit që është i fundit për vendimmarrje, siç është rasti i kryebashkiakut të Vorës. Nuk është tregues i një varësie, për më tepër që isha në periudhë kandidimi. Unë respektoj parimet e mia. Kam pasur vazhdimisht mbështetjen e faktorit ndërkombëtar. Nuk kam pasur mbështetje politike, për këtë të jeni të bindur”, u shpreh Marku përpara KLP-së.
E pyetur për takimet që ka zhvilluar me kryeministrin Rama gjatë periudhës së protestave të opozitës, Marku tha se takimet janë bërë në kuadër të situatës që ishte emergjente pasi protestat degjeneruan në dhunë.
“Takim me kryeministrin nuk kam bërë vetëm një, por disa. Kryeministri drejton disa komisione ku unë jam pjesë. Është e vërtetë, s’ka pasur një takim, por disa. Por ju i referoheshit një takimi të fundit që është bërë kur opozita ishte në protesta dhe pati shumë probleme, disa degjeneruan në dhunë dhe kjo ka qenë arsyeja jo vetëm me mua por edhe me drejtorin e SHISH, ministrin e Brendshëm, drejtuesit që ishin aktorë që trajtonin çështjet që lindnin nga dhuna e ushtruar në këto protesta prandaj nuk ka qenë takim raportues se s’ka një marrëdhenie të tillë mes ekzekutivit dhe prokurorisë, ka qenë një takim pune për shkak të situatës emergjente që po kalonte vendi dhe ne të gjithë e kemi parë e ndjekur nga afër”, tha Marku.
Gjatë raportimit të saj në KLP, Marku pranoi se nuk ka përmbushur pritshmëritë e publikut, po jo për fajin e saj por për shkak të Reformës në Drejtësi që është në vijim, për shkak të mungesës së institucioneve të drejtësisë.
“Pritshmëritë kanë qenë të larta, lidheshin me çështje konkrete, megjithatë për shkak të kompetencave të kufizuara nuk kam arritur të realizoj pritshmëritë. Procesi hetimor tani është jashtë kompetencave të Prokurorit të Përgjithshëm. Askush nuk është kujdesur të sqarojë një herë e mirë që roli i Prokurorisë të Përgjithshme ka ndryshuar. Tanimë është me rol simbolik për sistemin në tërësi dhe të munguar në hetimin e çështjeve konkrete. Nuk i kam realizuar pritshmëritë, por jo për fajin tim apo aftësive profesionale, po për shkak të reformës në veprim e sipër dhe kompetencave të kufizuara. Nëse do kthehesha pas, nuk do bëja asgjë më shumë e asgjë më ndryshe për shkak të kompetencave. Prokuroria ka qenë i vetmi institucion që ka funksionuar me kohë të plotë”,- tha Marku ndërsa u ndal edhe në vizionin e saj për Prokurorinë e Përgjithshme nëse fiton mandatin për këtë post.
“Nëse do zgjidhem sfidat janë të mëdha: përmirësimi i treguesve të punës, pavarësisht terrenit si punojnë, për shkak të numrit të kufizuar për shkak të shkarkimeve, rritje e besimit në sistemin e prokurorisë dhe tregues statistikorë të saktë. Çdo drejtues institucioni, duhet të ketë një vizion, një mënyrë si e sheh institucion pas disa kohësh. Vizioni im është që drejtuar nga kushtetuta t’i kontribuoj forcimimit e konsolidimit të pavarësisë së prokurorëve, rritje të aksesit të publikut në sistem pa cënuar sekretin hetimor” tha Marku.
Ajo shtoi se për të përmbushur misionin dhe vizionin e saj ka disa prioritete. “Fuqizim i drejtorisë gjyqësore në Prokurorinë e Përgjithshme pasi aty do jetë pesha më e madhe e punës pas vënies në funksion të Gjykatës Kushtetuese dhe asaj të Lartë. Ka një numër të madh çështjesh të akumuluara. Duhet shtuar numri i prokurorëve në Prokurorinë e Përgjithshme pasi aty po punohet me një numër të vogël prokurorësh. Gjithashtu është me shumë rëndësi komandimi i magjistratëve. Një prioritet i rëndësishëm është dhe forcimi i sektorit të dekriminalizimit”, tha Marku.
Marku theksoi se si Prokurore e Përgjithshme me mandat të plotë do zbatojë kompetencat që parashikon ligji. “Ku ka problematika do tentohet të unifikohen qëndrimet pa ndikuar në pavarësinë e brendshme të prokurorëve”, u shpreh ajo.
KLP do të zhvillojë intervista edhe me dy kandidatët e tjerë për postin e prokurorit të Përgjithshëm, konkretisht Fatjona Memçaj dhe Olsian Çela./realstory.al