Negociatat me BE, Gent Cakaj takon homologun holandez Stef Blok

Shqipëria vijon lotimin pranë vendeve anëtare, për të marrë votën “pro” të Këshillit të Europës për çeljen e negociatave. Ministri në detyrë për Evropën dhe Punët e Jashtme, Gent Cakaja ka zhvilluar një vizitë zyrtare në Holandë, vendi që është shprehur kundër vendit tonë për hapjen e negociatave me BE, por edhe më radikale në nismat e saj, për rikthimin e sistemit të vizave me Shqipërinë.

Sipas një deklarate të shpërndarë nga zyra për shtyp e MEPJ, Cakaj është pritur nga homologu i tij holandez Stef Blok. Po sipas komunikatës, mësohet se mes dy zyrtarëve të lartë, janë diskutuar marrëdhëniet bilaterale, reformat e ndërmarra nga qeveria shqiptare për përmbushejn e pesë prioriteteve kyçe, në kuadër të hapjes së negociatave me BE.

“Ministri në detyrë Cakaj dhe homologu i tij holandez nënvizuan arritjet e reformave të Shqipërisë veçanërisht në fushën e drejtësisë. Progresi i Shqipërisë është i padiskutueshëm edhe sipas vlerësimeve të palës holandeze. Po ashtu, në mënyrë që të adresohen shqetësimet e ndërsjella, përfshirë shqetësimet në fushën e migracionit të parregullt, u vlerësua jashtëzakonisht bashkëpunimi bilateral midis mekanizmave të rendit dhe sigurisë, si dhe u dakordua për bashkëpunim të mëtejshëm strategjik në të ardhmen”, thuhet ndër të tjera në deklaratën e Ministrisë për Europën dhe Punët e Jashtme.

Gjithashtu, sipas MEPJ, Cakaj mësohet të ketë theksuar nevojën e një vendimi pozitiv të Këshillit për hapjen e negociatave të anëtarësimit, që do të ishte një mesazh pozitiv për Shqipërinë.

“Ministri Cakaj theksoi nevojën për një vendim pozitiv të Këshillit për hapjen e negociatave të anëtarësimit, i cili do të ishte një mesazh inkurajues për Shqipërinë, rajonin e Ballkanit Perëndimor dhe perspektivën Evropiane të tij. Për më shumë, një proces i tillë do të kontribuonte në thellimin e momentumit të reformave të nisura nga Shqipëria në përgjithësi”, thuhet ndër të tjera në deklaratën e Ministrisë për Europën dhe Punët e Jashtme.

Gent Cakaj shkarkon 50 diplomatë: Reformë e gjerë, do ndryshojmë 80% të konsullatave

Ministri në detyrë i Punëve të Jashtme, Gent Cakaj në një konferencë për mediat deklaroi të mëkurën se janë shkarkuar dhe janë transferuar nga detyra 50 diplomatë shqiptarë.

Ai tha këto lëvizje bëhen në kuadër të një reforme të gjerë në trupin diplomatik shqiptar. Cakaj u shpreh se disa prej diplomatëve janë shkarkuar për arsye disiplinore ndërsa të tjerë për tejkalim të kompetencave.

Cakaj njoftoi ndryshimin e 80% të konsullatave shqiptare në botë në kuadër të reformës në diplomaci.

“Qëndrimi në shërbim diplomatik kërkon sjellje korrekte dhe avancimi në detyrë dëshmim profesional. Shqipëria nuk meriton asgjë më pak sesa meritokraci, profesionalizëm në detyrë dhe shërbim cilësor në diplomaci.

Lidhur me këtë parim themelor, komunikoj se 80% e konsullatave të përgjithshme të Shqipërisë në botë nuk do të jenë më të njëjta. Ata duhet të ndryshojnë rrënjësisht për shkaqe strukturore dhe për nevojën e rritjes së shërbimeve. Ato duhet të ndryshojnë në strukturë sepse fluksi i kërkesave të qytetarëve shqiptarëve nuk mund të përballohet më as me dembelim persona, as me inercinë e rutinës ditore dhe as me arrogancën e epërsisë institucionale”, u shpreh Cakaj.

Cakaj në Real Story: Diplomatë nga Kosova në ambasadat shqiptare në vendet që s’e njohin

Ministri për Evropën dhe Punët e Jashtme, Gent Cakaj ka qenë i ftuar në pjesën e dytë të emisionit Real Story të Sokol Ballës në Vizion Plus, përballë dy analistëve Skënder Minxhozi dhe Alfred Lela. Cakaj foli për progres raportin e Komisioni Europian që rekomandoi hapjen e negociatave pa kushte për Shqipërinë duke e konsideruar mjaft pozitiv, pasi konfirmoi arritjet e reformave që opozita ka kundërshtuar me forcë deri më sot. Cakaj tha se Shqipëria do të atashojë diplomatë nga Kosova në ambasadat, që ndodhen në vend ku nuk është njohur zyrtarisht Kosova.

Për deklaratat e Presidentit Thaçi për një bashkim të Shqipërisë dhe Kosovës, ministri Cakaj preferoi të mos i komentonte pasi i kalonin kompetencat e tij vendimmarrëse ndërsa tha se “Me Kosovën po shihej mundësia e Ambasadave të përbashkëta, konsullatave të përbashkëta, shërbimeve diplomatike dhe një task-force në ministri për kundërpërgjigje ndaj Serbisë për tërheqjen e njohjeve.”

Më pas, ministri Cakaj u ndal te progres raporti , që sipas tij nuk është lajm i vjetër edhe pse ka tendenca ta paraqesin si të tillë. “Raporti është pozitiv dhe rekomandon hapjen pa kushte të negociatave si vitin e kaluar dhe konstaton vlerësimet e Shqipërisë për të gjitha reformat e ndërmarra deri tani, gjë që opozita e ka kundërshtua gjerë më sot. Raporti, qartazi e bënë përgjegjëse opozitën për dështimin e reformës elektorale. Opozita është përgjegjëse që ka cenuar konsensusin shoqëror e politik në Shqipëri.” – tha Cakaj

Në studio pati replika mes analistit Alfred Lela dhe ministrit Cakaj në lidhje me vlerësimet e raportit, ndërsa Skënder Minxhozi u shpreh për raportin se “është hera e parë që në një gjendje kaq të ndezur politike në vend, e shoh kaq pak të trajtuar në të.”

Cakaj tha se përkundër krizës politike në vend, raporti bën më shumë rekomandime teknike dhe identifikon fakte, pasi ai e njeh parlamentin funksional dhe vlerëson progresin e arritur përkundër gjendjes politike që po kalon Shqipëria.

“Përkundër djegies së mandateve, raporti identifikon më tepër fakte se sa jep rekomandime politike. Por ka disa mënyra për ta lexuar këtë relacion. E para jeta parlamentare është e pacenuar dhe parlamenti gëzon të drejta e plota për marrë vendime dhe është funksional. Integriteti i institucionit ka mbetur i pacenuar. E dyta, Shqipëria ka vazhduar progresin përkundër krizës politike që po kalon. Pra axhenda e qeverisë ka mbetur e pacenuar dhe nuk është tjetërsuar. Gjithashtu duhet theksuar se Komisioni ka ndërruar strategji për rastin e Shqipërisë dhe Maqedonisë së Veriut, po aplikohet një strategji e re, për të siguruar që nuk do ketë prapakthim. Për ne procesi është bërë më rigoroz dhe pragu i meritave është ngritur edhe më lart. Kërkesat që i janë bërë Shqipërisë nuk i janë bërë asnjë vendi tjetër.”- tha Cakaj

Cakaj foli edhe në lidhje se si e pret qasjen e Këshillit Europian pas zgjedhjeve në BE, ku cilësoi dy rezerva në lidhje me hapjen e negociatave, ku në të parën Shqipëria nuk ka asgjë në dorë dhe në të dytën duhet të punojë me lobimin pozitiv të vendit.

“Rezultatet e zgjedhjeve europian kanë treguar se çështja e zgjerimit nuk ka qenë e lidhur me atë elektorale. Kundërshtimi i populizmit nuk mund të bëhet me mjete populiste. Ka dy lloj rezervash lidhur me hapjen e negociatave për Shqipërinë dhe Maqedoninë e Veriut. E para është parimore, ku BE duhet të konsolidohet nga brenda para se të zgjerohet nga jashtë. Në këtë rast Shqipëria është krejtësisht e pafuqishme të ndryshojë gjithçka dhe kjo lidhet me vizionin e europianëve për Europën. E dyta lidhet me mënyrën se si vende të caktuara anëtare e interpretojnë progresin e Shqipërisë dhe Maqedonisë së Veriut. Në këtë rast funksionarët e shtetit nisin lobimet për të rritur imazhin e Shqipërisë.”

Cakaj foli edhe për një mundësi të ndarjes së Shqipërisë dhe Maqedonisë së Veriut për hapjen e negociatave me BE-në duke thënë se një gjë e tillë nuk beson të ndodh pasi ‘dy vendet janë trajtuar në një pako për nga pikëpamjet teknike dhe administrative dhe janë në një stad. Nuk ka sinjale evidente se një gjë e tillë do të ndodhi.”

Cakaj: Shqipëria meriton hapjen e negociatave. Nuk bëj parashikime si Luli

Ministri i Jashtëm në detyrë, Gent Cakaj tha të enjten në një konferencë për shtyp se Komisioni Europian ka thënë të vërtetën për arritjet e Shqipërisë dhe se vendi ynë meriton hapjen e negociatave në qershor.

I pyetur nga gazetarët për deklaratën e Bashës një ditë më parë, i cili tha se negociatat nuk do të hapen, Cakaj tha se nuk bën të tilla parashikime.

“Gjithkush është mirë që të largohet nga përpjekja për të parashikuar fatin. Nuk e parashikoj dot, sikurse bën lideri i opozitës. Unë veproj duke u bazuar tek faktet dhe komunikimet me parterët. Në vend të teorive të konspiracionit duhet t’i kthehemi raportit të KE. Shqipëria e meriton hapjen e negociatave, çdokush që ka ndjenjën më të vogël të atdhetarizmit, duhet të bëjë një përpjeke për të mirën e vendit”, është shprehur Cakaj, i cili vlerësoi konstatimet e bëra në progres-raportin e KE-së.

“Raporti i ri është dëshmi e sukseseve të reja, dëshmia e përmbushjes së të gjithë rekomandimeve të KE. Në mënyrë kompetente aq sa voluminoze në një vlerësim milimetrit, KE ka vlerësuar evoluimin në kohë të Shqipërisë. Cilësi dhe entuziazëm shtesë të institucioneve në rrugën e BE. Nuk është thjeshtë “po” çështja kryesore, por edhe vetë mënyra se si janë paraqitur argumentet.

Shqipëria rast shembullor i transformimit të sistemit te drejtësisë dhe vlerësimin e gjyqtarëve dhe prokurorëve. Duke konsideruar numrin e konsiderueshëm të prokurorëve, raporti vlerëson lartë faktin se gjithë kjo punë është kryer nën monitorimin e OMN. Ka një vlerësim ndërkombëtar se si është bërë Reforma në Drejtësi, për shkak të pastrimit të tij, vendi ka ngritur dhe institucionet gjyqësore. Raporti konfirmon përpjekjen e qeverisë për të luftuar krimin e organizuar.

Qeveria jo vetëm nuk është e përfshirë, por ka vepruar me forcë kundër saj. KE konstatoi gjithashtu se vendi ka rritur bashkëpunimin me vendet anëtare, ka ndodhur arrestimi i personave kryesor të liderëve të krimit. Raporti vlerëson edhe reformën në administratën publike dhe rritjen graduale dhe përmirësimin cilësor të ekonomisë, nga 3.8% në 4.2% në 2018. KE ka thënë që Shqipëria ka bërë të gjithë punën e nevojshme të reformës elektorale, por kjo nuk është bërë një përpjekje nga liderët e tjerë.

Zero probleme me fqinjët. Është kusht për të avancuar tutje në rrugëtimin tonë europian. Është parakusht për axhendën Europiane. Maqedonia e Veriut ka bërë një hap historik në zgjidhjen e kontestit historik me Greqinë dhe nënshkrimin e traktatit me Bullgarinë. Për Shqipërinë marrëveshja me Greqinë, s’është kusht për çeljen Europiane. Greqia ka qenë pro për Shqipërinë në BE, nuk ka imponuar asnjë kushtëzim”, u shpreh ministri.

Raporti i Komisionit Evropian, Gent Cakaj: Tani duhet bashkëpunim ndërpartiak për integrimin

Pas marrjes së rekomandimit pozitiv nga KE për hapjen e negociatave për Shqipërinë, ka reaguar ministri i Jashtëm në detyrë, Gent Cakaj. Ai shkruan se tani duhet bashkëpunim ndërpartiak në Shqipëri dhe angazhim maksimal politik për të ecur drejt integrimit evropian.

“Raporti i Komisionit Evropian është kristal i qartë:

Shqipëria ka shënuar progresin e nevojshëm për hapjen e negociatave për anëtarësim në BE! Tani është koha e bashkëpunimit ndërpartiak në shërbim të integrimit dhe angazhimit maksimal politik për t’i shpalosur domosdoshmërinë e hapjes së negociatave Evropës!

Vlerësimi teknik i Komisionit duhet të shndërrohet në vullnet politik të Këshillit dhe Shqipërisë duhet t’i hapen negociatat menjëherë”, shkruan Cakaj.

Raporti i Komisionit Evropian është kristal i qartë: Shqipëria ka shënuar progresin e nevojshëm për hapjen e…
Gepostet von Gent Cakaj am Mittwoch, 29. Mai 2019

Patenta shqiptare “lëviz” lirshëm në këto shtete

Ministri i Jashtëm Gent Cakaj ka dhënë një lajm të mirë për të gjithë qytetarët shqiptarë duke i njoftuar se tashmë disa shtete e njohin pasaportën shqiptare dhe mund të udhëtoni lirshëm me automjetin tuaj.

Njohja e patentave shqiptare do ju mundësojë udhëtimin me automjetin tuaj drejt Belgjikës, Kroacisë, Malit të Zi, Serbisë, Maqedonisë së Veriut, Kosovës, ndërsa është ende në zhvillim e sipër njohja nga Italia dhe Greqia.

Patenta shqiptare aktualisht njihen nga këto shtete:

Belgjika: Shtetasit shqiptarë në Belgjikë, për një periudhë më pak se 3 muaj, mund të përdorin lejen shqiptare për drejtim automjeti. Në rast qëndrimi më gjatë në Belgjikë se periudha në fjalë, atëherë shtetasit shqiptarë duhet të bëjnë konvertimin e lejes së drejtimit shqiptare në leje drejtimi belge, sipas procedurave që ndiqen në komunat përkatëse.

Kroacia: Shtetasit shqiptarë në Kroaci mund të bëjnë njehsimin e lejeve të drejtimit bazuar në marrëveshjen dypalëshe që nga viti 2015.

Maqedonia e Veriut: Shtetasit shqiptarë në Maqedoninë e Veriut mund të bëjnë njehsimin e lejeve të drejtimit bazuar në marrëveshjen dypalëshe që nga viti 2013.

Serbia: Shtetasit shqiptarë në Serbi mund të bëjnë njehsimin e lejeve të drejtimit bazuar në marrëveshjen dypalëshe që nga viti 2015.

Mali i Zi: Shtetasit shqiptarë në Mal të Zi mund të bëjnë njehsimin e lejeve të drejtimit bazuar në marrëveshjen dypalëshe që nga viti 2015.

Kosovë: Shtetasit shqiptarë në Kosovë mund të bëjnë njehsimin e lejeve të drejtimit bazuar në marrëveshjen dypalëshe që nga viti 2012 e tutje. Pas përfundimit të afatit, marrëveshja është rinovuar dhe ka hyrë fuqi në maj 2019.

Nga ana tjetër, janë dy procese paralele në zhvillim e sipër për pranimin e lejeve të drejtimit me Italinë dhe Greqinë:

Italia: pas daljes së modelit të ri të lejeve të drejtimit, marrëveshja përkatëse që ka hyrë në fuqi në vitin 2009 dhe rinovuar në vitin 2014, i është nënshtruar ndryshimeve teknike të nevojshme. Ndryshimet teknike në marrëveshje janë pranuar parimisht prej dy qeverive dhe marrëveshja e re pritet të hyjë në fuqi pasi palët të njoftojnë njëra-tjetrën për përfundimin e procedurave të brendshme. Sipas parashikimeve të marrëveshjes, kjo çështje pritet të mbyllet përfundimisht shumë shpejtë.

Greqia: Marrëveshja dypalëshe për këtë çështje është nënshkruar në maj 2018. Edhe pse pala shqiptare ka përfunduar procedurat e brendshme të nevojshme për hyrjen në fuqi të kësaj marrëveshjeje, ajo nuk është ende në fuqi ngaqë pala greke nuk e ka ratifikuar atë në Parlament. Pra, çështja në fjalë nuk varet më nga Qeveria e Shqipërisë, por nga votimi në Parlamentin grek.

“Ambasada ime”, konsullata diplomatike në telefonin tuaj

“Ambasada ime” është një platformë online që çdo shqiptarë mund të aksesojë anembanë botës për t’u interesuar për çdo detaj që do i duhet për shërbime të ndryshme diplomatike, pasaportë, leje kalimi etj.

Kjo platformë u prezantuar ditën e sotme nga Ministri i Jashtëm në detyrë, Gent Cakaj, i cili theksoi se ky sistem aktiv do të mundësojë komunikimin e konsullatave shqiptare nëpër botë me qytetarët shqiptarë.

“Çdo shqiptar mund të pyesë me anë të platformës ‘Ambasada ime’ për çfarë atij i nevojitet. Shqiptarët mund të marrin dokumente, por dhe të pyesin për shërbimet diplomatike anekënd botës. “Ambasada ime” është sistem aktiv që mundëson komunikimin e konsullatave me qytetarët. Me ta mund të aplikohet për pasaportë, ID, leje kalimi apo dokumente të tjera, legalizime apo vërtetime etj. Nuk është pikë orientuese, por u qëndron afër qytetarëve. Platforma është instalim i një ndërgjegjësimi të shërbimit diplomatik shqiptar ndaj qytetarëve. Kjo platformë jep informacion të plotë për ambasadorët e Shqipërisë.” – tha Cakaj

Ministri Cakaj është optimist: Në qershor presim hapjen e negociatave

Megjithëse Samiti i Berlinit na la të kuptojmë se negociatat me BE-në do të shtyhen për në shtator, ministri i jashtëm në detyrë, Gent Cakaj vazhdon të jetë optimist. Ai është shprehur sot se pret që në muajin qershor BE të çelë negociatat me Shqipërinë. Cakaj ishte i pranishëm sot në hapjen e aktiviteteve për javën Europiane. Ai tha se 90 % e shqiptarëve mbështesin integrimin në BE.

“Këtë muaj presim marrjen e rekomandimit për hapjen e negociatave. Raporti i Komisionit presim që të jetë dëshmi e shndërrimit pozitiv që veni ynë ka bërë në rrugën e pakthyeshme të integrimit Europian. Procesi i integrimit të vendit në BE është edhe më gjerë se kaq

Hapja e negociatave për anëtarësimin, që pritet të bëhet në qershor do jetë një mundësi shtesë që ta bëjmë vendin institucionalisht më funksional”, tha ministri i Jashtëm në detyrë.

Rama-Merkel në Berlin, Cakaj: Konfirmoi mbështetjen e Gjermanisë

Kryeministri i Shqipërisë Edi Rama ka zhvilluar një takim kokë më kokë me Kancelaren gjermane, Angela Merkel në Samitin e Berlinit.

Në takim Rama është shoqëruar nga delegacioni i tij që përbëhej nga Ministri i Jashtëm, Gent Cakaj dhe Ministria e Shtetit për Marrëdhëniet me Parlamentin, Elisa Siropali.

Pas përfundimit të takimit nuk ka pas asnjë deklaratë për shtyp apo reagim nga Rama. Ndërsa ministri Cakaj ka reaguar përmes një statusi në Facebook, ku cilësoi se gjatë takimit Gjermania mbështeti fort hapjen e negociatave për Shqipërinë dhe vlerëson arritjen e saj në 5 prioritetet kryesore.

“Takimi me Kancelaren Angela Merkel konfirmoi edhe një herë mbështetjen absolute të Gjermanisë për çeljen e negociatave për anëtarësim të Shqipërisë në BE. Progresi i madh i Shqipërisë në 5 prioritetet kyçe, me theks të veçantë në reformën në drejtësi, merr vlerësimin më të lartë nga Gjermania. Shqipëria do të vazhdoj të luaj rolin e saj të pazëvendësueshëm në stabilitetin rajonal dhe afirmimin e vlerave evropiane në Ballkanin Perëndimor! Shumë mirënjohës për përkushtimin e Kancelares Merkel ndaj Shqipërisë.” – shkruan Cakaj

Takimi me Kancelaren Angela Merkel konfirmoi edhe një herë mbështetjen absolute të Gjermanisë për çeljen e negociatave…
Publiée par Gent Cakaj sur Lundi 29 avril 2019

Gent Cakaj e sqaron njëherë e mirë lidhjen e tij me vajzën e Linda Ramës

Ministri i Jashtëm në detyrë ka qenë mbrëmë i ftuar në Opinion ku Blendi Fevziu e pyeti edhe për lajmet që qarkullojnë se ai bashkëjeton me vajzën e Linda Ramës, Rea Xhillarin.

Për herë të parë Cakaj ka folur për këtë çështje ndërsa e ka mohuar në mënyrë kategorike duke thënë se është një shpifje për të goditur atë dhe kryeministrin Rama.

“Kjo përveç se është absolutisht e pavërtetë është edhe dashakeqe. Me autorët e kësaj do ballafaqohem në gjykatë. Kanë bërë gjithfarë obstruksionesh me këtë çështje. Kjo është një gënjeshtër absolute bëhet për të njollosur kryeministrin dhe reformën në ministrinë e jashtme.

Kjo korrespondon dhe me një iniciativë që kemi marrë në ministri që është lufta kundër nepotizmit dhe klaneve në diplomacinë shqiptare. Janë klane të caktuara po spekulojnë.

Unë jetoj vetëm dhe nuk jam në një lidhje. Kjo është produkt i fantazisë së shfrenuar dhe unë turpërohem të flas për këtë çështje” – tha Cakaj.