Tag: kosove

Në pranga 8 çekë, planifikuan ngritjen e dronit “Kosova është Serbi”

Policia e Kosovës ka arrestuar 8 shtetas çekë të cilët janë zbuluar teksa planifikonin ngritjen një droni gjatë ndeshjes së futbollit Kosovë-Çeki me mbishkrim provokativ “Kosova është Serbi”.

Policia Rajonale e Ferizajt bëri të mundur ndalimin e të këtyre personave, ndërkohë që në cilësinë e provës materiale u konfiskuan pajisjet dhe flamujt me mbishkrime.

Të ndaluar janë 6 burra dhe dy femra, ndërkohë që njëri prej tyre kishte nënshtetësi serbe. Ndeshja do të mbahet mbrëmjen e së shtunës në Stadiumin “Fadil Vokrri” në Prishtinë.

Video, masakër për pronat në Prishtinë, dy të vrarë dhe dy të plagosur

Dy të vdekur dhe dy të plagosur është bilanci i një sulmi të ndodhur në një nga lagjet e Prishtinës. Një person ka qëlluar me armë zjarri në drejtim të këtyre 4 personave, ngjarje e ndodhur rreth orës 16:00 në rrugën Muharrem Fejza në Prishtinë. Menjëherë në vendin e ngjarjes ka shkuar policia, ku ka bërë transportimin në spital të 4 të plagosurve. Dy prej të plagosurve humbën jetën në spital, ndërsa dy të tjerët ndodhen në gjendje kritike.

Dyshohet se ngjarja e rëndë ka ndodhur për motive pronësi, ndërsa policia vijon hetimet për kapjen e autorit.

Një video nga vendi i ngjarjes tregon një person me armë që qëllon ndaj 4 personave dhe më pas është larguar, ndërsa të plagosurit shfaqen të shtrirë në mes të rrugës.

Pacolli përplaset me Daçiç: Nuk jeni engjëll, mjaft me këto përralla

Ministri i jashtëm i Kosovës, Behgjet Pacolli është përplasur verbalisht me Ministrin e Jashtëm të Serbisë, Ivica Daçiç duke e akuzuar se ka një “sjellje me dy fytyra”. Pacolli tha se Serbia bën gjithçka për të bllokuar Kosovën dhe dhunuar qytetarët shqiptar në territorin serb, ndërkohë që në BE flet me fjalë të bukura dhe gatishmërinë për të bashkëpunuar. Ministri i jashtëm kosovar theksoi se edhe vendosja e taksës 100 % ishte reagim legjitim i frustrimit që Serbia bën ndaj Kosovës.

“Ju tregoni përralla të tjera në Beograd dhe të tjera këtu. Nuk jeni engjëll, ashtu siç doni të dukeni me fjalët e bukura para kolegëve të Europës. A ju duket europiane dhunimi i autobusëve, i qytetarëve, i bizneseve tona në pikat kufitare, apo në territorin e Serbisë? Skandalet që ju keni bërë nëpër Afrikë janë të njohura tashmë për të gjithë. Demarkacioni mes dy shteteve që nënkupton njohje reciproke, është i domosdoshëm, pa rregullime territoriale. Kosova është gati për dialog pa kushte, në baza barazie, por ne po bllokohemi ekonomikisht dhe diplomatikisht nga Serbia dhe Bosnjë-Hercegovina në rajon dhe kudo. Vendosja e taksës 100% ishte reagimi legjitim i frustrimit ndaj kësaj situate të papranueshme.” u shpreh Pacolli gjatë mbledhjes në Helsinki mes ministrave të jashtëm të BE.

Kosovë, partitë në lëvizje për koalicionet para zgjedhjeve

Partitë politike në Kosovë janë hedhur në përpjekje për të siguruar koalicionet parazgjedhore para mesnatës së të premtes kur edhe kalon afati i paraparë nga Komisioni Qendror i Zgjedhjeve. Kryetari i Lidhjes Demokratike të Kosovës, Isa Mustafa dhe ai i lëvizjes Vetëvendosje Albin Kurti u takuan të enjten për të vazhduar diskutimet rreth një mundësie të tillë. Lutfi Haziri, që është udhëheqës i fushatës së Lidhjes Demokratike, tha se këto dy parti janë afër bashkimit me njëra tjetrën.

“Takimet janë të rregullta dhe të punës, nga këto ditë e fundit keni njoftime më shumë ma herët nuk i keni pasur, kemi punuar në nivele të grupeve të punës tash ka ardhur niveli politik. Kryetarët e partive janë duke punuar për të finalizuar marrëveshjen parazgjedhore në mes dy subjekteve. Ky është vullnet i LDK-së dhe ky vullnet nuk ndryshon deri në minutën e fundit përkundër që LDK-ja mundet t’i fitoj zgjedhjet vet, është e gatshme me i fitu zgjedhjet vet”,tha zoti Haziri.

Zoti Haziri shprehu besimin për bashkimin e dy subjekteve politike rreth një koalicioni të përbashkët.

“Në politikat sektoriale i kemi definuar dhe jemi pajtuar, nuk kemi dallime, tash jemi duke punuar në politika kadrovike dhe natyrisht LDK-ja e ka kandidatin e vet për kryeministre, jo kandidatën e mundshme por kandidate për kryeministre, ne dëshirojmë ta bëjmë kryeministre të Republikës. Ata de fakto e kanë liderin e tyre, zoti Kurti ka qenë gjithmonë i nominuari i vetëm i Vetëvendosjes për kryeministër, nuk kanë pasur plan të dytë”,tha zoti Haziri.

Ndonëse caktimi i kandidates për kryeministre nga Lidhja Demokratike u duk se dëmtoi këto negociata, meqë lëvizja Vetëvendosje kërkonte që ajo të kandidonte kryetarin e saj Albin Kurti, janë hedhur ide për mundësinë e një marrëveshjeje që do të mundësonte një rotacion në drejtimin e qeverisë në rast se krijohet një koalicion i tillë dhe fiton në zgjedhje.

Deri më tash janë krijuar dy koalicione parazgjedhore ,në njërën anë Nisma Socialdemokrate e Kosovës dhe Aleanca Kosova e Re, ndërsa tjetra ndërmjet Aleancës për Ardhmërinë e Kosovës dhe Partisë Socialdemokrate. Tani për tani, Partia Demokratike nuk ka hapur negociata me ndonjërën prej partive tjera.

Kosova do të votojë më gjashtë tetor, pas shpërndarjes së parlamentit të Kosovës javën e kaluar dhe mese një muaj pas dorëheqjes të kryeministrit Ramush Haradinaj, i cili u thirr për t’u marrë në pyetje në Prokurorinë e Posaçme në Hagë e cila trajton pretendimet për krime lufte dhe të pasluftës në Kosovë.

Këto zgjedhje shihen të rëndësishme për Kosovën për shkak të sfidave me të cilat pritet të përballet qeveria e re, posaçërisht me çështjen e tarifave ndaj mallrave serbe dhe ripërtëritjen e bisedimeve te pezulluara me Serbinë, për normalizimin e marrëdhënieve ndërmjet dy vendeve, që është edhe kusht për integrimet evropiane të tyre. /VOA/

LDK, me kandidaten e parë femër për kryeministre në historinë e kombit

Vjosa Osmani, është e para kandidate grua për kryeministre në kombin shqiptar që vjen nga radhët e Lidhjes Demokratike të Kosovës. Osmani është një nga kandidaturat për të forta të kësaj partie dhe njihet  si një përkrahëse e fortë e mbrojtjes së territorit të Kosovës. Ajo është cilësuar nga mediat kosovare si Angela Merkel e Kosovës dhe është gruaja më e votuar ndonjëherë në Kosovë.

Kandidatja e LDK, Vjosa Osmani aktualisht është kryetare e Komisionit për Punë të Jashtme, Diasporë dhe Investime Strategjike. Më herët ka shërbyer si Kryetare e Komisionit për Integrime Evropiane dhe nënkryetare e Komisionit për Reforma Kushtetuese në Kosovë.

Kosova po shkon në zgjedhje të parakohshme parlamentare pas dorëheqjes së kryeministrit Haradinaj dhe të gjitha partitë janë fokusuar në fushatën elektorale dhe kandidati për kryeministër.

Sulmi ndaj autobusit në Serbi, reagon qeveria: Jemi në kontakt me BE

Gjatë mbrëmjes së të shtunës një autobus i Kosovës i mbushur me udhëtarë shqiptarë është sulmuar me gurë në Krushevac të Serbisë. Për këtë incident ka reaguar këshilltari i zv/kryeministrit të Kosovës Jetlir Zyberaj, i cili u bëri thirrje qytetarëve të vendit të shmangin udhëtimet që kalojnë përmes territorit të Serbisë.

Ndërkohë, ai nuk la pa sulmuar dhe Ministrin e Jashtëm të Serbisë Ivica Daçiç për retorikën e papranueshme dhe propagandën kundër Kosovës, të cilat çojnë në realizimin e akteve vandalizuese.

“Përderisa Ministri Daçiç si ish-zëdhënës i Millosheviçit  bën të gjitha përpjekjet e tij për lajme të rreme dhe propagandë kundër Kosovës, ai duhet të përqendrohet në ndalimin e incidenteve që janë iniciuar nga vetë Beogradi. Ne jemi në kontakt me BE dhe kërkojmë përgjegjësi të plotë dhe garanci nga Beogradi për sigurinë nëse qytetarët tanë udhëtojnë nëpër Serbi. Gjithashtu përsërisim thirrjen e MPJ së Kosovës që të shmanget udhëtimi nëpër Serbi përderisa nuk ka siguri për Kosovarët dhe incidentet vazhdojnë. Kjo është vazhdimësi e incidenteve dhe jo rast i izoluar”, ka thënë Zyberaj.

SERBËT SULMOJNË ME GURË AUTOBUSIN ME TARGA SHQIPTARE

Trumpi i “dytë” ndodhet në Malin e Zi: Do ndërtoj mur me Shqipërinë dhe Kosovën

Mali i Zi do të ngrejë një mur në kufi me Shqipërinë dhe Kosovën për të parandaluar bandat e drogës. Kështu ka deklaruar drejtuesi i Lëvizjes Malazeze për Ndryshim, Nebojsha Medojeviç, që ka lënë të shokuar të gjithë shqiptarët që ndodhen në Malin e Zi.

Medojeviç tha se “Fronti Demokratik, kur të vijë në pushtet, do të ishte gati të ngrejë një mur midis Malit të Zi, Kosovës dhe Shqipërisë për shkak të bandave të drogës”. Kjo deklaratë është bërë shkasë për reagimin ashpër dhe të zemëruar të pakicës shqiptare që jeton në Malin e Zi, e cila u shpreh se kjo deklaratë ‘poshtëron shumicën e atyre partive shqiptare dhe disa shqiptarë që dikur mbështetnin politikat e tij”.

Ndërsa politikanët shqiptarë në Malin e Zi thanë se “ Medojeviç po përpiqet të nxisë urrejtje kombëtare midis qytetarëve malazezë dhe në kohën e kufijve të hapur, të thuash diçka të tillë në të nxehtin e një lufte politike është e papranueshme.”

Pas reagimeve të shumta të shqiptarëve ka ardhur edhe zbutja e tonit nga Medojeviç, i cili shpjegoi se deklarata e tij nuk kishte lidhje me popullin shqiptar apo malazez, por ekskluzivisht kundër mafies malazeze dhe shqiptare.

Ngritja e një muri në kufi na kujton rastin e presidentit te SHBA , Trump, i cili kërkon ngritjen e tij për ndalimin e hyrjes së emigrantëve.

Kosova drejt zgjedhjeve të parakohshme, shpërndahet Kuvendi

Parlamenti i Kosovës ka vendosur për shpërndarjen e tij me 89 vota pro, 1 kundër dhe 2 abstenim. Shpërndarja i hap rrugën zgjedhjeve të parakohshme në Kosovë.

Gjatë seancës plenare ku ishin të pranishëm 106 deputetë u morr vendimi për shpërndarjen e parlamentit duke i dhënë fund legjislaturës së gjashtë të Kuvendit të Republikës së Kosovës. Sipas Kushtetutës së Kosovës, shpërndarja e Kuvendit në këtë rast, mund të realizohet më dy të tretat e votave të deputetëve, pra 80 vota, ndërsa vendimi u morr me 89 vota.  

Pas dorëheqjes së kryeministrit të Kosovës, Ramush Haradinaj, i cili mori ftesë që të intervistohet nga Gjykata Speciale si i dyshuar për krime lufte, presidenti Hashim Thaçi zhvilloi takime me partitë për të zgjedhur një të mandatar të dytë, por nuk u arrit në një dakortësi. Kjo çoi në shpërndarjen e parlamentit dhe mbajtjen e zgjedhjeve të parakohshme. Në nenin 66 të Kushtetutës së Kosovës thuhet se në raste të shpërndarjes së Kuvendit zgjedhjet do të mbahen jo më vonë se 45 ditë pas shpërndarjes. Një ditë më herët Presidenti Thaçi lajmëroi se data më e afërt për të mbajtur zgjedhjet e parakohshme është data 6 tetor.

SHBA, Vuçiçit: Normalizo marrëdhëniet me Kosovën, forcon Serbinë

SHBA ka kërkuar nga Serbia të normalizojë marrëdhëniet me Kosovës dhe të rinis dialogun mes tyre, pasi kjo do të sjell qëndrueshmëri jo vetëm mes dy vendeve, por do të forcojë edhe Serbinë. Këto diskutime u bënë gjatë një drektë pune në New York mes sekretarit amerikan të shtetit, Mike Pompeo me presidentin serb Aleksandër Vuçiç.

Pompeo shkoi në twitter se ka kërkuar “normalizimi e marrëdhënieve me Kosovën që të forcohet qëndrueshmëria dhe përparimi i Serbisë, Ballkanit Perëndimor dhe komunitetit transatlantik”.

Po përmes rrjeteve sociale ka vendosur të flasë për takimin e presidenti Vuçiç, i cili deklaroi se i ka kërkuar SHBA që “të përpiqet më fuqishëm që të ndikojë mbi Kosovën që të heqin tarifat ndaj mallrave serbe.”

Tarifat e vendosur ndaj produkteve serbe kanë sjelle dhe bllokimin e bisedimeve mes Serbisë dhe Kosovës , për më shumë se një vit. Beogradi nuk pranon të rifillojë negociatat pa hequr taksën, ndërsa Kosova nuk pranon ta heq taksën nëse Serbia nuk e njeh atë si vend të lirë dhe të pavarur.

Shkëmbimi i territoreve, Palmer: Kjo vendoset mes Kosovës dhe Serbisë

“Sfida e tanishme e Kosovës është krijimi i një qeverie, e cila do ta kthente vendin sa më shpejt në normalitet dhe do të sillte rinisjen e dialoguar me Serbinë.” Ky ka qenë mesazhi që Matthew Palmer, zëvendës Ndihmës Sekretar i Shtetit për çështjet e Evropës dhe Euroazisë, ka dhënë në lidhje me situatën e krijuar në Kosovë pas dorëheqjes së Ramush Haradinaj. Në një intervistë për Zërin e Amerikës, Palmer tha sfida e menjëhershme e Kosovës është krijimi i një qeverie të re sa më shpejtë të jetë  e mundur për normalizimin e situatës në vend dhe më pas kjo qeveri të riniste dialogun. Palmer përsëri qëndrimin që SHBA ka mbajtur gjatë gjithë kësaj kohe, që të pezullohej taksa 100 % e mallrave që vijnë nga Serbia, taks e mbrojtur me forcë nga Haradinaj.

“Mendoj se ajo që është nevojshme tani është krijimi i një qeverie në Kosovë. Kjo është sfida e menjëhershme. Ne duam që Kosova të fillojë përpjekjet për formimin e një qeverie sa më shpejt që të jetë e mundur. Ne do të dëshironim që ajo qeveri pastaj t’i kthehet sa më shpejt dialogut, përfshirë pezullimin e tarifës ndaj mallrave të Serbisë dhe Bosnje Hercegovinës. Ne shpresojmë që kjo të fillojë së shpejti.” – tha Palmer

Për sa i përket një shkëmbimi të mundshëm të territoreve mes Serbisë dhe Kosovës, Palmer nuk u shpreh kundër kësaj nëse kjo gjë do të arrihej mes palëve. Gjithçka duhet të arrihet me marrëveshjen mes dy palëve tha Palmer dhe të sigurohen që marrëveshjet  të jenë gjithëpërfshirëse për normalizimin e  marrëdhënieve dhe jo vetëm të fokusohen në harta e territore. Palmer tha se asnjë palë nuk do të detyrohet të bëjë diçka që nuk e dëshiron.

“Ne tani jemi të përqendruar te rikthimi i palëve në tryezën e bisedimeve. Me t’u kthyer në tryezë, sigurisht është pastaj çështja se për çfarë do të negociojnë. Dhe i takon në të vërtetë vetë palëve të përcaktojnë se cilat janë parametrat e asaj që do të negociohet. Asnjëra nga palët nuk do të detyrohet të bëjë diçka që nuk mund ta bëjë. Por ne do të dëshironim që negociatorët të negocionin me vullnet të mirë për një marrëveshje që mund të çojë në njohje reciproke mes Serbisë dhe Kosovës dhe në një rrugë drejt Evropës. Shtetet e Bashkuara nuk do të vendosin ose diktojnë se cila do të jetë sfera e negociatave. Çdo marrëveshje që do të arrihet do të jetë gjithëpërfshirëse, do të ketë komponentë politike, të sigurisë, ekonomike, tregtare, kulturore, për shembull kur është fjala për pronën e kishës ortodokse në Kosovë. Pra, unë mendoj se përqendrimi vetëm te hartat dhe territoret e zhvendos mjaft vëmendjen nga domethënia e vërtetë e marrëveshjes gjithëpërfshirëse për normalizimin. Përkufizimi i normalizimit është përgjegjësi e palëve. Dhe ato mund ta bëjnë këtë vetëm në tryezën e dialogut.” –tha Palmer

Shkëmbimi i territoreve dhe taksa e vendosur ndaj produkteve serbe ka qenë një çështje e nxehtë debati në Kosovë, mes kryeministrit Ramush Haradinaj dhe presidentit Thaçi. Haradinaj është shprehur gjithmonë kundër shkëmbimit të territoreve si dhe heqjes së taksës. Në daljet e tij  për mediat, Haradinaj ka thënë se ndërkombëtarët duhet të ndalin presionin për të hequr taksën, pasi kjo gjë nuk ka për të ndodhur deri sa Serbia të njoh Kosovës. Të njëjtin qëndrim Haradinaj e mbajti deri në fund edhe gjatë dorëheqjen së tij, i cili tha prerë “Taksa nuk hiqet”.

Lexoni këtu intervistën e plotë të Matthew Palmer .

Skip to toolbar