Bindja Demokratike prezanton kandidatët, Patozi: Jemi alternativë serioze përballë Rilindjes

Partia Bindja Demokratike e drejtuar nga Astrit Patozi, ka publikuar një video, ku kandidatët e kësaj partie që do të garojnë në zgjedhjet lokale të 30 qershorit, prezantojnë veten dhe u bëjnë thirrje qytetarëve për të votuar partinë më të re shqiptare.

Video hapet me kandidatin për kryetar të Bashkisë së Tiranës, Arben Skënderi, i cili u bën thirrje qytetarëve të votojnë Bindjen Demokratike, si një alternativë për më shumë dinjitet dhe shërbim ndaj qytetarëve.

Kryetari i BD, Astrit Patozi mbyll videon duke u bërë thirrje qytetarëve shqiptarë të votojnë Bindjen, që sipas tij, është një alternativë serioze përballë “Rilindjes” së konsumuar.

“Për ne të gjithë Shqipëria është e para. Bindja Demokratike është sot në shërbim të dashurisë dhe respektit për Shqipërinë dhe qytetin. Në këto zgjedhje ne kemi kandidatë për kryetar dhe këshilltar bashkie nga Tropoja në Sarandë dhe nga Korça në Durrës”.

“Edhe pse forcë e re politike, Bindja vjen si një ofertë serioze për 30 qershorin në kontrastë të fortë ndaj “Rilindjes” së konsumuar që kemi përballë, dhe atyre që kanë ikur nga procesi”, thotë Patozi ndër të tjera në mesazhin drejtuar qytetarëve.

Kolegji Zgjedhor rrëzon KQZ, Bindja Demokratike me kandidat në Berat

Kolegji Zgjedhor ka rrëzuar vendimin e KQZ, që i ndalonte kandidimin partisë Bindja Demokratike të kandidatit Pavllo Shkarpa. KQZ rrëzoi më herët kërkesën e kandidatit të BD në Berat, pasi kishte gjetur parregullsi në regjistrimin e tij në gjendjen civile. Por Kolegji Zgjedhor e ka hedhur poshtë këtë argumentim, duke e cilësuar të pavlefshëm.

Tashmë edhe në bashkinë e beratit do të ketë dy kandidat për kryetar bashkie në zgjedhjet e 30 qershorit. Pas vendimit të Kolegjit Zgjedhor ka ardhur dhe reagimi zyrtar i Bindjes Demokratike, e cila shkruan: “Pas këtij vendimi në qytetin 2400 vjeçar pritet të ketë një garë të fortë dhe reale, mes përfaqësuesve të qeverisë dhe të opozitës”.

“Vendimi është pritur shumë mirë në Berat, pasi zoti Shkarpa është personalitet shumë i njohur në atë qytet. Ai është prej vitesh kryetar i shoqatës “ANTIPATREA”, e cila ka zhvilluar shumë aktivitete për promovimin e kulturës dhe të vlerave të qytetit të Beratit”.

KQZ rrëzon kërkesën e BD për regjistrimin e kandidates së Cërrikut

Komisioni Qendror i Zgjedhjeve, në mbledhjen e ditës së sotme, votoi me 3 vota pro dhe 2 kundër për pranimin e kërkesës ankimore të subjektit Bindja Demokratike, që kishte ankimuar vendimin e KZAZ-së nr. 46, për mos regjistrimin e kandidates për kryetare të Bashkisë Cërrik, Merita Xhika, për zgjedhjet për organet e qeverisjes vendore të 30 qershorit. KQZ vendosi rrëzimin e kërkesës dhe lënien në fuqi të vendimit të KZAZ-së nr. 46.

Pas hedhjes së shortit dhe relatimit të kërkesës ankimore, KQZ vendosi pranimin e kërkesës së subjektit “Bindja Demokratike”, me objekt ‘Kundërshtimi i vendimit të KZAZ-së nr. 79, për mos regjistrimin e listës shumë emërore të kandidatëve për anëtarë të Këshillit të Bashkisë Libohovë, për zgjedhjet për organet e qeverisjes vendore, të datës 30 qershor 2019”. Kërkesa do të shqyrtohet në mbledhjen e datës, 27 maj.

KQZ shqyrtoi edhe projektvendimet: “Për caktimin e disa qendrave të votimit në ndërtesa private, për zgjedhjet për organet e qeverisjes vendore të datës 30 qershor 2019” dhe “Për lirimin dhe emërimin e anëtarëve të KZAZ nr. 07, nr. 60, për zgjedhjet për organet e qeverisjes vendore të datës 30 qershor 2019”.

Bindjes Demokratike i largohet edhe një tjetër kandidat

Kandidatët e partisë më të re në vend, Bindja Demokratike janë duke u tërhequr nga gara një e nga një. Pas largimit të kandidatëve të Bashkisë Çorovodë, Bashkisë Lezhë dhe Bashkisë Kavajë është shtuar në listën e të larguarve edhe kandidati për Bashkinë e Kamzës.

Ylber Gjeta ka paraqitur kërkesën e tij në Komisionin Qendror të Zgjedhjeve për t’u tërhequr nga gara për kryetar në Bashkinë Kamëz.

Në deklaratën e tij drejtuar KQZ-së, Gjeta thotë se tërhiqet nga gara për arsye shëndetësore.

Patozi: E vërteta e firmës së Lefter Kokës për BD

Koordinatori i Bindjes Demokratike, Astrit Patozi ka sqaruar njëherë e mirë firmën e hedhur nga deputeti Lefter Koka dhe paligjshmërinë për të cilat akuzohet nga PD.

Patozi tha se firmat e Lefter Kokës është për siguri pas asaj të Andi Përmeti duke dhënë mbështetjen e tij për krijimin e partisë Bindja Demokratike. Këtë mund ta bënte kushdo dhe një socialist ka thënë Patozi për Top Talk.

“E kam marrën zotin Koka, për siguri. Sepse e dija që gjuetia e shtrigave ndaj Bindjes Demokratike do të vazhdonte dhe do të përdorej si një argument për të rrëzuar pjesëmarrjen e saj në zgjedhje. E kam marrë për rezervë. E falenderoj që pranoi. Firma e zotit Koka për BD, nuk do të thotë se ai u bë me demokrat dhe unë u bëra i majtë. Ai vetëm ka dhënë një akses politik që kjo parti lejohet të garojë. Këtë mund ta bënte edhe një socialist e nuk do të kishte asgjë të keqe.” – tha Patozi

Akuzat e PD, Patozi: Asgjë s’na ndalon të garojmë më 30 qershor

Astrit Patozi ka reaguar me fakte në lidhje me akuzat që PD ka bërë për pavlefshmëri të kandidatëve të Bindjes Demokratike. PD tha më herët se kandidatet e partisë Bindja Demokratike janë false, pasi nuk mbështeten në mandat deputeti në të paktën 6 muajt e fundit.

Në reagimin e tij Patozi tha se në fakt jo një po dy deputetë kanë firmosur në mbështetje të Bindjes Demokratike duke treguar edhe një dokument ku ka firmosur Lefter Koka.

“Sqarojmë publikun se BINDJA DEMOKRATIKE mbështetet jo nga një, por nga firmat e dy deputetëve për të garuar dhe kandiduar në gjithë Shqipërinë. Ata janë zotërinjtë Lefter Koka dhe Andi Përmeti, dhe për këtë ekziston e gjithë praktika e depozituar në KQZ.” – shkruan Patozi

Gjithashtu Patozi tha se Basha të mos merret me ndjekjen dhe përgjimin e Bindjes Demokratike, pasi ajo është e krijuar sipas ligjit dhe afateve kohore të përcaktuara nga ai.

Postimi i plotë

ASGJË NUK E NDALON BINDJEN DEMOKRATIKE TE GAROJË MË 30 QERSHOR

E vetmja gjë që e mban në këmbë për të mos ikur me vrap, si tek protesta e fundit, partinë e vetëdjegur të Lulzim Bashës është urrejtja dhe meraku që ka për BINDJEN DEMOKRATIKE. Në fakt, ne ua kuptojmë hallin, por nuk i ndihmojmë dot.
E vetmja punë që ata bëjnë qysh nga data e krijimit të forcës sonë politike është që të na ndjekin dhe përgjojnë, për çdo fjalë që themi dhe çdo veprim që bëjmë, por ne nuk shqetësohemi fare nga kjo. Përkundrazi, e konsiderojmë si reklamë falas për një parti të re.
Sot paskan shpikur që kandidatët tanë qenkan të paligjshëm, sepse nuk u mbështetkan nga një mandat deputeti në të paktën 6 muajt e fundit.
Sqarojmë publikun se BINDJA DEMOKRATIKE mbështetet jo nga një, por nga firmat e dy deputetëve për të garuar dhe kandiduar në gjithë Shqipërinë. Ata janë zotërinjtë Lefter Koka dhe Andi Përmeti, dhe për këtë ekziston e gjithë praktika e depozituar në KQZ. Më poshtë, fotokopja e shkresës së protokolluar.
Por përgjuesit tanë të palodhur bëjnë sikur nuk e kanë parë këtë dhe flasin për paligjshmëri.
Dhe që ta mbledhin mendjen një herë e mirë e mos të lodhen kot, duke u përpjekur çdo ditë të na kapin në gabim, po u themi sot se BINDJA DEMOKRATIKE i ka kapur të gjitha afatet dhe detyrimet ligjore për të konkurruar në 26 bashki me kandidatë për kryetar dhe në rreth 55 të tilla për lista këshilli. Madje në shumë raste ne kemi pasur edhe firmat e qytetarëve të disa bashkive, përvec atyre të deputetëve, të cilat ishin kriter i mjaftueshëm, sipas ligjit.
Si përfundim, i ftojmë që të qetësohen ata që kanë zgjedhur të na ndjekin ne, e të mos hyjnë vetë në zgjedhje. Ata nuk do të na pengojnë dot kurrë që ne të marrim pjesë dhe të garojmë në procesin e pandalshëm të 30 qershorit.

Bindja Demokratike zyrtarizon kandidatët për zgjedhjet lokale

Partia më e re në vend, Bindja Demokratike, ka zyrtarizuar ditën e sotme kandidatët e saj për 25 bashki të vendit në zgjedhjet lokale të 30 qershorit. Përmes zëdhënëses së tyre për mediat, Antonela Bregu janë paraqitur të 25 emrat për kandidatë dhe me një profil të shkurtër të tyre.

Lista e kandidatëve:

Bashkia Berat-Pavlo Shkarpa/ Lindur dhe rritur ne Berat, zoti Pavlo Shkarpa edhe si drejtues i shoqatës Antipatrea është një nga qytetaret me te spikatur te Beratit si kontributor kryesor i ruajtjes se vlerave historike te qytetit dhe lobues i Beratit ne UNESCO. Pavlo Shkarpa është inxhinier dhe hartues i dhjetëra projekteve te ruajtjes dhe promovimit te qytetit te Beratit.

Bashkia Bulqizë –Ilir Balla/ Intelektual, arsimtar, lindur dhe rritur ne Shupenze. Ka mbajtur poste te larta ne administratën arsimore dhe atë vendore. Prej vitit 2003 e ne vijim punon si menaxher ne sektorin privat.

Bashkia Cërrik- Merita Xhika/ Shume aktive ne jetën publike te qytetit te Cërrikut, Merita është mësuesja e qytetit, qe ka marre përsipër te angazhohet dhe kontribuoje jo vetëm ne edukimin e te rinjve te Cërrikut, por edhe ne përmirësimin e jetës se te gjithë qytetit.

Bashkia Devoll- Fejzi Shaholli/ Fizikant ne formim, ai mban dhe funksionin e sekretarit te marrëdhënieve ndërkombëtare te komunitetit mysliman dhe ka kryer trajnime deri ne Departamentin e Shtetit Amerikan. i është ofruar qytetit ku jeton si kandidat i pavarur ne këto zgjedhje dhe ka te gjithë mbështetjen e Bindjes Demokratike për te fituar kundër qeverise ne bashkinë e devollit.

Bashkia Durrës – Valbona Sakollari/ Mund te konsiderohet pa e tepruar si një zbulim i bindjes demokratike, një oferte fantastike për Durrësin me 30 qershor. Me një karriere te admirueshme ne sipërmarrjen private, pedagoge ne universitet dhe e super kualifikuar brenda e jashtë vendit.

Bashkia Dibër – Shkëlzen Qoka/ I diplomuar ne menaxhim biznes, Shkëlzen qoka ka një karriere te admirueshme jo vetëm ne sektorin privat por edhe ne atë publik duke përfshirë funksione te larta publike si ish kryetar komune. Hartues dhe menaxhues i dhjetëra projekteve zhvilluese ne rrethin e Dibrës.

Bashkia Kolonje- Fatjon Feka/ Një djalë i ri ne moshe por me kualifikime te plota si administrator me përvoje ne sektorin e pushtetit vendor te rrethit te Ersekës. I angazhuar qe ditët e para me bindjen demokratike.

Bashkia Gramsh- Sabri Ibrahimi/ Sabri Ibrahimi është një gramshiot jo pak i njohur dhe gjithmonë nje qytetar i angazhuar per zhvillimin e treves ku ka lindur dhe është rritur. I diplomuar si inxhinier ndërtimi, Sabri Ibrahimi është projektues i jo pak veprave publike ne qytet dhe me gjere.

Bashkia Kavaje- Bledar Sinella/ Njihet si një nga kontribuesit me te spikatur te sportit te futbollit kavajas dhe shqiptar, si trajner i disa prej klubeve te kategorisë superiore dhe kombëtares se moshave shqiptare. Ka përfunduar universitetin e edukimit fizik dhe atë te drejtësisë dhe sot ofrohet për te qene qytetari i pare i Kavajës.

Bashkia Kamëz- Ylber Gjeta/ Qendrestar i vendosur i te djathtës shqiptare ne periudhat me te vështira te opozitarizmit ne vend. Pjesëtar i grevës se urisë se studenteve ne vitin 1998, ylber gjeta ka qene gjithmonë aktivist i radhëve te para te lëvizjeve studentore dhe opozitare ne Shqipëri.

Bashkia Këlcyrë- Shkelqim Muhaj/ Është një djalë i trevës se Këlcyrës qe zotëron ne zone një nga bizneset me te mira te agroturizmit dhe agroperpunimit.

Bashkia Klos- Bedri Hoxha/ Disa here deputet i kuvendit te republikës se Shqipërisë, Bedri Hoxha është një nga politikanet me aktive dhe te niveleve me te larta te qarkut te Dibres. Këtë here ka vendosur qe ne cilësinë e kandidatit te pavarur te behet qytetar i pare i bashkisë Klos dhe ka te gjithë mbështetjen e bindjes demokratike.

Bashkia Korçe- Leonard Olli/ Antar i bordit themeltar te bindjes demokratike dhe personazh shume aktiv ne jeten politike te viteve te fundit. I laureuar ne shkencat e komunikimit ai ka qene funksionar i larte i opozitës shqiptare ne këshillin bashkiak Tirane.

Bashkia Kukës- Abedin Uruci/ Abedin Uruci eshte nje nga kontributoret kryesore te qarkut te kukesit, qe ka mbajtur poste te rëndësishme qe nga viti 2000 e deri me sot, si kryetar i komunës Kolsh dhe kryetar i qarkut te Kukësit deri me tani.

Bashkia Kurbin – Edmond Piroli/ Pavarësisht se jurist i ri ne moshe, me nje karriere te admirueshme ne fushen e avokatise, ka kontribuar si zyrtar i larte ne institucionet e regjistrimit te pasurive dhe ato penitenciare. Është nje nga pinjollet e familjeve me te shquara dhe atdhetare te Kurbinit.

Bashkia Lezhe – Salvador Kacaj/ Ikona e futbollit te Besëlidhjes dhe Kombëtares qe me vepra konkrete e ktheu Shëngjinin ne emblemën e turizmit shqiptar. Administratori i suksesshëm qe meritoi vëmendjen me te madhe edhe ndërkombëtare, përfshi dhe binjakëzime te niveleve me te larta. Zoti Kacaj është njeriu i fitoreve spektakolare sportive dhe elektorale.

Bashkia Malesi e Madhe-Pjerin Spathari/ Kandidati i Bindjes Demokratike për Malësinë e Madhe ka nisur angazhimin publik si pjesëmarrës i lëvizjes studentore 90. Ka qene kryetar komune i zonës se Kastratit, nënkryetar i qarkut Shkodër, prej 10 vitesh rresht kryetar dhe nënkryetar i degës se Partisë Demokratike Malësi e madhe, ka qene nga themeltaret e pare te bindjes demokratike ne këtë treve.

Bashkia Sarande – Ilir Nikolla/ Kandidat i pavarur per drejtimin e bashkisë te Sarandës, ka mbështetjen e plote te bindjes demokratike ne këtë sfide. I diplomuar ne dy fakultete, ka pasur një kontribut te rendesishem qe ne vitet e para te demokracisë ne administraten shteterore dhe vendore ne qarkun e Sarandës.

Bashkia Selenice- Marildo Hodaj/ Është një i ri i diplomuar ne fakultetin ekonomik, dega turizëm, i angazhuar vitet e fundit jo vetëm ne sektorin publik, por edhe ne ate privat sa i përket menaxhimit turistik.

Bashkia Skrapar-Dejvis Hebibasi/ Lindur ne qytetin e Skraparit ka kryer studimet e larta ne fushën e edukimit fizik. Si i ri, ka qene gjithmonë i angazhuar ne jeten e qytetit dhe ka spikatur si menaxher ne sektorin privat.

Bashkia Shijak- Arben Pohumi/ Biznesmen i njohur i qytetit te Shijakut qe ditët e para te ndryshimit te sistemit, ka themeluar dhe administron kompaninë Ag Motors. I vlerësuar me titullin qytetar nderi i Durrësit, ka spikatur si individ me iniciative te veçante dhe kontribuues ne jetën publike te qytetit.

Bashkia Tirane – Arben Skenderi/ Arben Skenderi do te jete sharm i fushatës se kryeqytetit. Nje nder artistet dhe pedagoget me te njohur te vendit, i përzgjedhuri i Bindjes Demokratike për te bere diferencën me falsitetin e rilindjes, qe kemi përballë. Përfaqësues shembullor i modelit te ri qe duam te sjellim per Tiranën dhe te gjithe Shqipërinë.

Bashkia Tepelene – Gezim Malka/ Inxhinier ndërtimi, 3 here kryetar komune, dhe disa here te tjera drejtues ne administratën vendore te qytetit.

Bashkia Tropoje- Edison Hasanaj/ I laureuar me dy fakultete ne fushën e shkencave politike dhe sociale, Edison Hasanaj është nje i ri ne moshe qe kërkon te kontribuoje ne jetën publike te qytetit te Tropojës.

Bashkia Vlore- Valbona Mezini/ Ka studiuar për gazetari dhe ka ushtruar profesionin e saj ne mediat kryesore te vendit. Qe diten e pare te aktivitetit te saj politik është spikatur si opozitare me mazhorancen aktuale. Ka mbajtur postin e anëtares se kryesise te partise demokratike dhe qe diten e pare te themelimit është anëtare e bordit përfaqësues te bindjes demokratike.

Ndërkohë, BINDJA DEMOKRATIKE ka kandidatë për këshilltarë në këto Bashki, të renditura më poshtë sipas rendit alfabetik:
Belsh, Berat, Bulqizë, Cërrik, Delvinë, Devoll, Dibër, Divjakë, Dropull, Durrës, Elbasan, Fier, Finiq, Gjirokastër, Gramsh, Has, Himarë, Kamëz, Kavajë, Këlcyrë, Klos, Kolonjë, Konispol, Korçë, Krujë, Kukës, Kurbin, Lezhë, Libohovë, Librazhd, Lushnje, Malësi E Madhe, Maliq, Mallakastër, Mat, Mirditë, Patos, Peqin, Përmet, Pogradec, Përrenjas, Roskovec, Rrogozhinë, Sarandë, Selenicë, Shijak, Shkodër, Skrapar, Tepelenë, Tiranë, Tropojë, Vau Dejës, Vlorë, Vorë.

Rrëzohet padia. Regjistrimi i partisë së Patozit, i ligjshëm

Kolegji Zgjedhor ka rrëzuar ditën e sotme, padinë e bërë nga Partia Bashkimi Demokrat Shqiptar për ligjshmërinë e Partisë Bindja Demokratike, të Astrit Patozit.

Kolegji Zgjedhor vendosi se regjistrimi i Bindjes Demokratike është në përputhje me ligjin. Fill pas këtij vendimi ka ardhur reagimi i Astrit Patozit i cili shkruan se ky ishte stërkëmbëshi i fundit që PBD kapërceu dhe tashmë ajo është e fokusuar tek zgjedhjet.

“BINDJA DEMOKRATIKE kapërceu sot edhe stërkëmbëshin e fundit të atyre, që i trembeshin më shumë pranisë së saj, se sa mungesës së tyre në zgjedhjet lokale të 30 qershorit.

Tanimë, jemi tërësisht të fokusuar tek gara për të treguar se jemi realisht fryma e re dhe shpresa e vetme për ndryshim në këtë vend. Keqardhje për ata që u përpoqën më kot të na pengonin në të drejtën tonë për t’u ofruar shqiptarëve një projekt të ri politik, krejtësisht të ndryshëm nga “Rilindja” e korruptuar dhe nga opozita e dëshpëruar, e cila paralajmëron përplasje civile për të mbuluar vetëvrasjen e vet politike.

BINDJA DEMOKRATIKE po vjen si ortek vullnetesh shpërthyese shqiptarësh të lirë, të cilët nuk e kanë humbur besimin se ky vend mund të bëhet prej nesh vetë. Zoti e bekoftë BINDJEN e qeverive dhe të politikanëve ndaj popullit”, shkruan Patozi.

Regjistrimi i BD, Kaso: I paligjshëm, Rama armik i zgjedhjeve

“Vendimi i paligjshëm dhe politik i shumicës së Ramës në KQZ është një tjetër provë për opozitën se Edi Rama është armik i zgjedhjeve të lira dhe të ndershme.” Kështu e ka quajtur demokrati Ivi Kaso vendimin e KQZ për regjistrimin e Bindjes Demokratike. Përmes një reagimi në Facebook, Kaso e ka cilësuar si të paligjshëm regjistrimin e Bindjes Demokratike në zgjedhjet e 30 qershorit dhe ka akuzuar Ramën se kërkon të ketë një opozitë fasadë.

“Arsyeja pse Edi Rama vendosi që të uzurponte KQZ, duke emëruar në kundërshtim me ligjin 4 anëtarë nga PS, është që, sa herë ka zgjedhje, të shpikë rregullat e lojës sipas qejfit. Sot vendosi të regjistrojë Bindjen Demokratike si opozitë fasadë, si patericën e tij në zgjedhje me synimin për të zbehur mungesën e opozitës së vërtetë. Vendimi i paligjshëm dhe politik i shumicës së Ramës në KQZ është një tjetër provë për opozitën se Edi Rama është armik i zgjedhjeve të lira dhe të ndershme.”- shkruan Kaso

Kaso e mbyll shkrimin e tij duke thënë se Rama e ka të kotë, pasi populli ka vendosur që në datën 30 qershor nuk ka për të patur zgjedhje.

Arsyeja pse Edi Rama vendosi qe te uzurponte KQZ, duke emeruar ne kundërshtim me ligjin 4 anetare nga PS, eshte qe, sa…
Publiée par Ivi Kaso sur Samedi 27 avril 2019

KQZ regjistron Bindjen Demokratike, Zguri kundërshton

Komisioni Qendror i Zgjedhjeve ka regjistruar me 4 vota pro dhe 1 kundër partinë më të re Bindja Demokratike për pjesëmarrjen e saj në zgjedhjet e 30 qershorit.

Ajo që pritej të ishte një proces rutinë dhe të miratohej me vendim unanim, në fakt rezultoi në kundërshtim të fortë të vetë kryetarit të KQZ-së, Klement Zguri. Gjatë komentit të tij, Zguri tha se Bindja Demokratike nuk ka lindur ende në kuptimin juridik, pasi nuk kemi një vendim të gjykatës dhe si e tillë nuk mund të regjistrohet.

“Unë si zyrtar i shtetit, dhe si administrator i zgjedhjeve, nuk mundet dhe nuk mund t’ia lejoj vetes që dëshirat e mia, t’ia mbivendos ligjit. Edhe në momentin që flasim, vendimi i gjykatës nuk ka marrë formë të prerë, c’ka nënkupton se partia Bindja Demokratike, akoma nuk ka lindur në kuptimin juridik dhe nuk mund të bëjë, veprime. Kemi një vendim të vitit 2015, më shumë se gjysma e anëtarëve që jemi këtu kemi qenë prezentë, kemi qenë aktorë, kemi votuar 7 me 0 që një subjekt të mos regjistrohet dhe që ishte në të njëjtat kushte që mos regjistrohej për zgjedhjet e vitit 2015. Zgjedhjet janë të qytetarëve, duhet të kenë alternativa të bollshme dhe zgjedhjet të jenë të ndershme dhe demokratike, por mbi të gjitha duhet të jenë ligjore. Unë nuk jam i bindur se subjekti në fjalë, plotëson kriteret ligjore për të garuar në zgjedhjet.” – tha Zguri